د خوست لوبډلې د لومړۍ درجه شل اوریزو کرېکټ ولایتي سیالیو اتلولي وګټله
د وزیر محمد اکبر خان لومړۍ درجه ولایتي شل اوریزې سیالۍ لس ورځې مخکې د کندهار او ننګرهار ولایتونو په کوربتوب پیل شوې وې او د جمعې په ورځ (د سلواغې ۲۴مه) د خوست لوبډلې په اتلولۍ پای ته ورسېدې.
د افغانستان کرېکټ بورډ ویلي، چې د وزیر محمد اکبرخان لومړۍ درجه شل اوریزه کرېکټ ولایتي سیالۍ د ۱۲ لوبډلو ترمنځ د روانې فبرورۍ میاشتې په درېیمه نېټه د کندهار او ننګرهار په کوربتوب پیل شوې وې او بالاخره د خوست لوبډلې په اتلولۍ سره پای ته ورسېدې.
د وزیر محمد اکبر خان لومړۍ درجه ولایتي کرېکټ سیالۍ پایلوبه کې د خوست الف او خوست ب لوبډلو ترمنځ ترسره شوه، چې په پایله کې د خوست الف لوبدلې د خوست ب لوبډلې ته د ۶ وېکټو په توپیر ماتې ورکړه او د اتلولۍ جام یې په خپل نوم کړ.
د کرېکټ بورډ کورني کرېکټ څانګې ویلي، چې دا سیالۍ په لومړي ځل ترسره شوې او موخه یې د افغانستان د شل اوریزه کرېکټ ملي لوبډلې لپاره د نویو لوبغاړو موندل وو.
