د طالبانو تر واک لاندې افغاني سرې میاشتې ټولنې ویلي، په ننګرهار ولایت کې یې د تېرو ۳۰ ورځو په ترڅ کې شاوخوا ۶۱ زره ناروغانو ته پراخ روغتیايي خدمتونه وړاندې کړي دي، چې په کې د معاینې، درملو وېش، خوارځواکۍ درملنه او د امیندواره مېرمنو روغتیايي مشورې شامل دي.
د افغاني سرې میاشتې د معلوماتو له مخې، د دغې ادارې روغتیايي کارکوونکو د ننګرهار ولایت په بېلابېلو ولسوالیو او کلیو کې د تېرو ۳۰ ورځو په ترڅ کې ۶۱ زره او ۳۷۲ تنه ناروغانو ته د معاینې او درملو د ورکړې، د ټپونو د پانسمان، د واکسینونو د تطبیق او د خوارځواکۍ د درملنې خدمتونه ترسره کړي دي.
دغه راز، یادې ادارې ویلي چې امیندواره مېرمنو ته له زېږون مخکې او وروسته اړینې روغتیايي مشورې ورکړل شوې او د کورني پلان د تنظیم په برخه کې هم لازمې لارښوونې شوې دي.
د راپور له مخې، سربېره پر دې ۳۱ زره او ۶۲۲ ناروغانو ته د بېلابېلو روغتیايي ستونزو په تړاو ضروري مشورې هم وړاندې شوې دي.
