په افغانستان کې د ملګرو ملتونو د بشري مېشتځایونو ادارې (یونهبیټاټ) ویلي چې په ۲۰۲۶ کال کې شاوخوا ۴ اعشاریه ۲ میلیونه کسان په هېواد کې بیړني سرپناه او غیرخوراکي لومړنیو توکو ته اړتیا لري.
د ملګرو ملتونو دغه ادارې په خپل تازه ایکس پوسټ کې ټینګار کړی چې مناسبه سرپناه د یو باثباته راتلونکي لومړنی ګام دی او د دې اړتیاوو د پوره کولو لپاره بیړني اقدام ته اړتیا ده.
ادارې خبرداری ورکړی چې د سرپناه او اړینو توکو د نشتوالي دوام کولی شي د زیانمنو کورنیو ژوند لا پسې له ګواښ او بېثباتۍ سره مخ کړي.
دا څرګندونې داسې مهال کېږي چې افغانستان لا هم له طبیعي پېښو، اقتصادي ستونزو او بشري فشارونو سره مخ دی، او میلیونونه کسان د اساسي خدماتو او خوندي استوګنځای له کمښت سره لاس او ګرېوان دي.
