په بامیان کې ژمنۍ سپورټي سیالۍ پیل شوې
په بامیان کې د څلورو ولایتونو د لوبغاړو تر منځ ژمنۍ سپورټي سیالۍ پیل شوې. په دغو سیالیو کې له بامیان سربېره د کابل، میدانوردګ او غزني ولایتونو لوبغاړي ګډون لري.
د بامیان ولایت لپاره د طالبانو رسنیز دفتر د شنبې په ورځ (د سلواغې ۲۵مه) د یوې خبرپاڼې په خپرولو سره ویلي، د دغې سیالۍ لومړی پړاو پر یخ د اسکېټ او کرلېنګ برخو کې په بند سبزک سیمه کې ترسره شو.
د خبرپاڼې پر بنسټ، پر یخ د اسکېټ په څانګه کې له کابل، غزني او میدانوردګ ولایتونو شپږو لوبغاړو ګډون درلود او په پایله کې یې د غزني لوبغاړو لومړی مقام وګاټه او همداراز په کرلېنګ څانګه کې له کابل، میدانوردګ او بامیان څخه ۲۵ لوبغاړو ګډون درلود او په پایله کې یې د کابل لوبغاړو لومړی مقام خپل کړ.
د یادو ولایتونو د لوبغاړو تر منځ به د اسکي په برخه کې سیالۍ نن (یکشنبه د سلواغې ۲۶مه) په جرخشک سیمه کې ترسره شي.
