د هرات ولایت طالب چارواکو د پنځه میلیونه ډالرو په ارزښت، په دغه ولایت کې د څلور فصله نړیوال عمده بازار د پروژې بنسټ ډبره ایښی. دغه بازار چې په ۶۵ جریبه ځمکه کې جوړیږي د کرنیزو محصولاتو لپاره پکې سړې خونې هم شاملې دي.
د هرات ولایت د رسنیو دفتر له خوا په خپره شوې خبرپاڼه کې راغلي، دغه پروژه د ۶۵ جریبه ځمکې پر مساحت، په څلورو برخو کې طرحه شوی او ټاکل شوې چې په شپږو میاشتو کې بشپړ شي.
خبرپاڼه زیاتوي، په دغه پروژه کې شاوخوا ۶۰۰ دوکانونه، یو جامع جومات، او د ۲۵ جریبه ځمکې باندې سړه خونه شامله ده چې د ۲۰ زره ټنو زراعتي توکو د ساتنې وړتیا لري.
د پرانیستې په مراسمو کې د طالبانو د کرنې، اوبو لګولو او مالدارۍ وزارت مرستیال او يه هرات کې د طالبانو والي اسلامجار ګډون کړی و.
د طالبانو کرنې وزارت مرستیال د دغه بازار جوړېدل د سبزیو او تازه مېوو د پروسس او خوندي ساتنې لپاره مهم ګام بللی دی.
خبرپاڼه زیاتوي، د هرات والي اسلامجار له بزګرانو وغوښتل چې د کرنې متخصصینو په مشوره داسې محصولات وکري چې لږو اوبو ته اړتیا ولري او د کرنې د میکانیزه کېدو بهیر ته پاملرنه وکړي، ترڅو د سیمې اقتصادي پرمختګ او د خوراکي توکو د کیفیت ښهوالی تضمین شي.
