د طالبانو ویاند وایي، دوی داسې مستند شواهد لري چې یادې ډلې ته پاکستان په خپله خاوره کې روزنیز مرکزونه او پټنځایونه ورکړي او اوس یې له بلوچستان نه خیبر پښتونخوا ته لیږدولي. هغه د ټي ټي پي په تړاو ویلي چې په افغانستان کې نشته او شته خلک یوازې بې وسلې وزیرستاني کډوال دي.
مجاهد چې د تهران راډیو پښتو څانګې سره یې خبرې کولې زیاته کړه، «موږ داسې مستند شواهد او راپورنه خپاره کړل چې پاکستان داعش ډلې ته لومړی د بلوچستان په مستونګ سیمه کې پناه ځایونه ورکړي وو او د خپلو موخو لپاره یې کارول، دا دی اوس یې په خیبر پښتونخوا کې دا ډله ځای پر ځای کړې ده».
طالب ویاند د یوې پوښتنې په ځواب کې چې د اسلام اباد د شیعه وو پر جومات وروستي برید ته پکې اشاره شوې وه، چې ولې ؟ که داعش په پاکستان کې پټنځایونه او د پوځ ملاتړ له ځان سره لري په دې هېواد کې بریدونه ترسره کوي، وویل: « بدبختانه چې پاکستان د خپلو مرمزو استخباراتي موخو لپاره دا بده پدیده کاروي او ملاتړ یې کوي، د داعش روزل داسې دي لکه په لستوڼي کې د مار پالل، دا د پاکستان له خوا د داعش پروژې د پالیسۍ نتیجه ده، چې د دواړو هېوادونو د خلکو په تاوان ده.»
ذبیح الله مجاهد، د ټي ټي پي په اړه وویل، چې د دغې ډلې وسله وال جنګیالي په افغانستان کې حضور نه لري او شته خلک یوازې بې وسلې وزیرستاني کډوال دي چې دوی د ډیورنډ کرښې له نږدې سیمو څخه لرې لېږدولي دي.
هغه زیاته کړه، چې ټي ټي پي د پاکستان کورنۍ مساله ده او باید خپله یې حل کړي.
نومړي زیاته کړې چې طالبان هیچا ته دا اجازه نه ورکوي څو د افغانستان خاوره د نورو پر ضد د وسله والو فعالیتونو لپاره وکاروي.
مجاهد په داسې حال کې د داعش او ټي ټي پي په اړه څرګندونې کوي چې څو ورځې وړاندې په اسلام اباد کې د شیعه وو پر یو جومات کې د ځانمرګي برید لهکېدو وروسته، چې پړه یې داعش په غاړه واخیسته، د پاکستان د دفاع وزیر خواجه اصف او نورو چارواکو وویل چې له روژې وړاندې به یې غچ واخلي.
د پاکستان د کورنیو چارو وزیر محسن نقوي وویل، چې که څه هم ځانمرګی بریدګر افغان وګړی نه و، خو څو ځله یې افغانستان ته سفر کړی او له هغه ځایه یې وسله واله روزنه ترلاسه کړې وه.
