د افغانستان د مخکېني جمهوري نظام د ملي امنیت سلاکار رنګین دادفر سپنتا د امریکایي سناتور لینډسي ګراهام د وروستیو څرګندونو په غبرګون ویلي، چې نوموړی ایران ته د "ازادۍ" راوستلو خبره کوي، خو پخوا یې په افغانستان کې د لا ډېرو زندانونو د جوړولو غوښتنه کوله.
سپنتا د افغانستان د تېرې تجربې په رڼا کې د دغسې تګلارو د پایلو په اړه خبرداری ورکړی دی.
سپنتا په خپل پیغام کې لیکلي، چې سناتور لینډسي ګراهام تر دې وړاندې هم د افغانستان په اړه د لا ډېرو زندانونو د جوړولو غوښتنه کړې وه.
د هغه په وینا، له بګرام زندان څخه چې د امریکايي ځواکونو لهخوا جوړ شوی و، له طالبانو سره د هوکړې په پایله کې نږدې شپږ زره کسان خوشې شول. نوموړي زیاته کړې، چې په دغو خوشې شویو کسانو کې د داعش، طالبانو او نورو نړۍوالو ترهګرو ډلو غړي شامل وو.
د سپنتا په باور، دغه کسان روزل شوي او د ورانکارۍ لپاره چمتو وو او د هغوی خوشې کېدل د افغانستان لپاره جدي امنیتي پایلې درلودې. هغه د همدې تجربې په یادولو سره ټینګار کړی، چې یوازې پر پوځي او امنیتي لارو ولاړې تګلارې نه یوازې دا چې په افغانستان کې یې تلپاتې ثبات رامنځته نهکړ، بلکې په ځینو مواردو کې یې د ناامنۍ د پراختیا زمینه هم برابره کړه.
دغه څرګندونې داسې مهال مطرح کېږي، چې افغانستان د ۱۴۰۰ لمریز کال له بدلونونو وروسته لا هم له سختو امنیتي او سیاسي ننګونو سره مخ دی او په دې هېواد کې د توندلارو ډلو د فعالیتونو په اړه اندېښنې لا هم دوام لري.
د بېلاروس د بهرنیو چارو وزارت د دوشنبې په ورځ (د سلواغې ۲۷مه) د یوې خبرپاڼې په خپرولو سره ویلي، په دې کتنه کې دواړو لوریو افغانستان ته د بېلاروسي د تخنیکي وسایلو، کرنیزو او نورو اړینو محصولاتو د صادراتو د زیاتوالي په تړاو خبرې کړې دي.
په خبرپاڼه کې راغلي: «دغه تولیدات په افغانستان کې د سترو پراختیایي پروژو د پلي کېدو لپاره ضروري دي».
د بېلاروس د بهرنیو چارو وزارت لومړي مرستیال سرګي لوکاشېوېچ په افغانستان کې د بنسټيزو او رغونې په چارو کې د ملي پراختیا شرکت فعالیتونه وستایل.
خبرپاڼه زیاتوي، چې د دغې لیدنې په پای کې دواړو لوریو د صنعت، کرنې او خوراکي توکو، روغتیا او پوهنې په برخو کې د اړیکو پر پیاوړتیا هوکړه کړې ده.
د شنونکو په باور، د افغانستان په لویو پراختیايي پروژو کې تر ډېره روسي او بېلاروسي ودانیز او نور تجهیزات کارول کېږي او ښايي په دې سفر کې د نویو تجهیزاتو د پېرلو په تړاو هم هوکړې وشي.
