د پاکستان د پخواني لومړي وزیر عمران خان زامن وايي، زندان کې د خپل پلار د روغتيايي حالت د خرابېدو په اړه سخت اندېښمن دي او د هغه د ليدنې لپاره يې د پاکستان د وېزې غوښتنه کړې ده. هغوی له پاکستاني چارواکو غوښتي، چې تر دوو کلونو زياتې جلاوالي وروسته دې ورته د پلار د ليدو اجازه ورکړي.
تېره اوونۍ د عمران خان وکيل د پاکستان سترې محکمې ته ويلي وو، چې نوموړي د بند په موده کې د خپلې ښي سترګې د ليد د پام وړ برخه له لاسه ورکړې ده. خو د دوشنبې په ورځ يو طبي پلاوي اعلان وکړ، چې له درملنې وروسته پړسوب کم شوی او د هغه د سترګې ليد هم ښه شوی دی.
قاسم او سليمان خان چې ۲۶ او ۲۹ کاله عمر لري او په لندن کې اوسېږي، د رويټرز خبري اژانس سره په خبرو کې ويلي چې دوی پر خپور شوي طبي راپور باور نه لري. هغوی زياته کړې، چې د تېرې سپټمبر مياشتې راهيسې يې د لومړي ځل لپاره د پنجشنبې په ورځ له خپل پلار سره ټلېفوني خبرې کړې دي.
د دوی په وينا، عمران خان عادت لري چې د خپل روغتيايي حالت په اړه له خبرو ډډه وکړي، خو په وروستۍ اړيکه کې يې ورته ويلي، چې د څو مياشتو لپاره د سترګو له درملنې بېبرخې و. قاسم خان وويل: «له پلار څخه اوږدې جلاوالي کله ناکله موږ ناهيلې کړي يو». هغه زياته کړې، چې پلار يې بايد پر وسایلو سمبال روغتيايي مرکز ته ولېږدول شي او خپلو شخصي ډاکټرانو ته د لاسرسي اجازه ورکړل شي.
بل لور ته، پاکستاني چارواکي وايي چې د درملنې بهير روان دی او د مخالفينو هغه تورونه ردوي چې ګواکې بې پروايي شوې ده. سترې محکمې هم له اړوندو ادارو غوښتي، چې د هغه د درملنې د څرنګوالي بشپړ جزييات وړاندې کړي.
عمران خان چې ۷۳ کلن دی، د ۲۰۲۳ کال د اګست له مياشتې راهيسې په زندان کې دی. هغه او د هغه ګوند تحریک انصاف پر نوموړي لګېدلي تورونه سياسي انګېزه لرونکي بولي.
پر هغه د ۲۰۲۲ کال کې د بې باورۍ د رايې له لارې له واکه تر لرې کېدو وروسته څو دوسيې جوړې شوې دي، چې پهکې د دولتي سوغاتونو او يو ناقانونه واده اړوند تورونه هم شامل دي. ځينې سزاوې ځنډول شوې يا لغوه شوې دي او د استيناف غوښتنې لا هم تر څېړنې لاندې دي. عمران خان ټول تورونه رد کړي دي.
قاسم او سليمان د عمران خان او د هغه د پخوانۍ مېرمنې جمایما ګولډ سمېټ تر بېلتون وروسته په برېټانيا کې لوی شوي دي. دوی ويلي، چې د ۲۰۲۲ کال د نومبر له هغې پېښې وروسته يې خپل پلار نه دی ليدلی، کله چې هغه له يوه بريد څخه ژوندی ووت. د دوی په وينا، تېرې مياشتې يې د وېزې غوښتنه کړې، خو تر اوسه يې ځواب نه دی ترلاسه کړی.
سليمان خان د دې پوښتنې په ځواب کې چې ښايي د ځنډ لامل څه وي، وويل: «کېدای شي واکمن بنسټونه اندېښنه ولري چې زموږ ليدنه به د هغه حالت ته لا زيات پام واړوي». په لندن کې د پاکستان سفارت او د پاکستان د بهرنيو چارو وزارت تر دې دمه د نظر غوښتنو ته ځواب نه دی ويلی.
قاسم خان ټينګار وکړ، چې د دوی بېړنۍ اندېښنه د پلار روغتيا ده، خو نور مهم ټکي هم شته، لکه د هغه ازادي، د بشري حقونو درناوی او د عادلانه محاکمې تضمين.
په همدې حال کې، په پاکستان کې رسنيو ته د عمران خان د نوم، ويناوو او انځورونو د خپرولو اجازه نه ورکول کېږي او يوازې د هغه يو محکمه يي انځور چې له بند وروسته اخيستل شوی، د خلکو لاس ته ورغلی دی.
تحريک انصاف ګوند په ۲۰۱۸ کال کې واک ته ورسېد او لا هم په ځينو مهمو ايالتونو کې پراخ ولسي ملاتړ لري. په تېرو څلورو ورځو کې د دې ګوند پلويانو د خېبرپښتونخوا او پنجاب تر منځ سترې لارې تړلې دي، چې له امله يې زرګونه موټر درېدلي او په ځينو سيمو کې د سون توکو او خوراکي توکو رسونه ټکنۍ شوې ده.
قاسم خان د خپل پلار پلويانو ته په يوه پيغام کې وويل: «خپل باور ټينګ وساتئ او مبارزې ته دوام ورکړئ. دا هماغه پيغام دی چې موږ يې هم د پلي کولو هڅه کوو».
