بنیامین نتنیاهو: ایران د باور وړ نهدی
د امریکا او ایران ترمنځ د کړکېچ او پر دغه هېواد د احتمالي بریدونو په درشل کې د اسراییل لومړي وزیر ویلي، چې ډونالډ ټرمپ غواړي له پوځي اقدام وړاندې له تهران سره هوکړې ته د رسېدو ټولې لارې و ازمايي، خو نوموړی له ایران سره د هر ډول هوکړې په اړه بدبینه دی.
د اسراییل لومړي وزیر بنیامین نتنیاهو د یکشنبې په ورځ (د سلواغې ۲۷مه) اسراییل ته د "امریکا د لویو یهودي سازمانونو د مشرانو کنفرانس" د پلاوي د ۵۱مې کلني سفر پر مهال وویل، د متحده ایالاتو ولسمشر ډونالډ ټرمپ باور لري چې تهران به د ۱۲ ورځنۍ جګړې له تجربې وروسته، هوکړې ته د رسېدو فرصت له لاسه ورنهکړي.
نوموړي له دې سره سره زیاته کړه: «دا نه پټوم چې له تهران سره د هرې هوکړې په اړه شک لرم، ځکه که رښتیا ووایم ایران په یو شي کې د ډاډ وړ دی؛ هغه دا چې درواغ ووايي او درغلي وکړي».
