د طالبانو د معیار او کیفیت اداره وایي، چې د کورنیو بازارونو د ساتنې او د مصرفکوونکو د حقونو د خوندیتوب په موخه یې له ترکمنستان څخه وارد شوی۲۴،۵۳ټنه بېکیفیته قیر بېرته هماغه هېواد ته ورګرځولی دی.
د یادې ادارې په وینا، دغه قیر د تورغونډۍ بندر له لارې هېواد ته د داخلېدو پر مهال د تخنیکي ارزونې او د کیفیت د دقیق کنټرول له بهیر وروسته، د داخلي معیارونو سره د نه سمون له امله بازار ته د داخلېدو اجازه ترلاسه نه کړه.
یادې ادارې ددې ترڅنګ چې د بېکیفیته او غیرمعیاري موادو د داخلېدو پر وړاندې به هېڅ ډول نرمښت ونه شي له ټولو سوداګرو او واردوونکو غوښتي چې د توکو له واردولو مخکې د هېواد معیارونو ته په جدي ډول پاملرنه وکړي او د سالم او باکیفیته بازار د تأمین لپاره له دې ادارې سره همکاري وکړي.
