روغتیايي سرچینو الجزیرې ته ویلي، چې د یکشنبې په ورځ د غزې په تړانګه کې د اسراییل په تازه بریدونو کې لږ تر لږه ۱۱فلسطینیان وژل شوي دي. د دغو تلفاتو له زیاتېدو سره، د اکتوبر میاشتې راهیسې د اوربند له پیل وروسته د وژل شویو فلسطینیانو شمېر تر ۶۰۰اوښتی دی.
سرچینې وایي، چې اسراییلي ځواکونو د اوربند د وروستي نقض په ترڅ کې د غزې په شمال کې د جبلیا او همداراز د خان یونس په سیمو کې د بېځایه شویو فلسطینیانو پر خیمو بریدونه کړي، چې له امله یې لږ تر لږه ۱۱کسان وژل شوي دي.
د حماس ویاند دغه بریدونه «نوې ډلهییزه وژنه» او «جنایت» بللي او ویلي یې دي، چې د دغو بریدونو دوام ښيي، د اوربند د ټینګښت لپاره نړیوالې هڅې بېنتیجې پاتې شوې دي.
د غزې د چارواکو د معلوماتو له مخې، د ۲۰۲۵کال د اکتوبر له ۱۰مې نېټې راهیسې، لږ تر لږه ۶۰۱فلسطینیان وژل شوي او له ۱۶۰۰زیات نور ټپیان شوي دي. همداراز، د غزې د رسنیو دفتر ویلي، چې اسراییل د ۲۰۲۵کال د اکتوبر له ۱۰مې څخه د ۲۰۲۶کال د فبرورۍ تر ۱۰مې پورې د اوربند تړون له ۱۶۲۰څخه زیات ځله نقض کړی دی.
په ورته وخت کې، اسراییل بیا حماس تورنوي، چې د اوربند له تړونه یې سرغړونه کړې او ادعا کوي، چې د دې ډلې په بریدونو کې یې څلور سرتېري وژل شوي دي.
