د ملګرو ملتونو د کډوالو عالي کمېشنرۍ وايي، په پاکستان کې د زیاتېدونکو فشارونو، محدودیتونو، ناوړه وضعیت او جبري ستنولو له امله له دغه هېواده هره ورځ زرګونه افغان کډوال بېرته افغانستان ته ستنېږي.
په هغه راپور کې چې نن سېشنبه (د سلواغې ۲۸مه) خپور شوی راغلي، چې کورنۍ د افغانستان او پاکستان په لاره کې ستړې او اندېښمنې ښکاري او ګڼې یې یوازې له ډېر کم سامان سره بېرته خپل هېواد ته ستنېږي او د خپل ژوند د بیارغونې لپاره هیڅ امکانات نهلري.
په دغه راپور کې راغلي، چې ګڼې کورنۍ په پاکستان کې له کلونو ژوند کولو وروسته له مالي سرچینو، رسمي اسنادو او ملاتړ پرته افغانستان ته ستنېږي. د ملګرو ملتونو د کډوالو عالي کمېشنرۍ (UNHCR) دارنګه ویلي، چې کورونو، روغتیایي خدمتونو او د کارموندنې فرصتونو ته د لاسرسي نشتوالي، د بشري حقونو ناوړه وضعیت په ځانګړې توګه د ښځو او نجونو لپاره د خوندیتوب جدي اندېښنې راپورته کړې دي.
