امریکايي چارواکی؛ ایرانیانو ویلي چې تر دوو اوونیو به له مفصلو وړاندیزونو سره راستانه شي
رویټرز د یوه امریکایي چارواکي له قوله لیکلي، چې له ایراني پلاوي سره په مذاکراتو کې پرمختګ شوی، خو لا هم ډېر جزیات پاتې دي چې باید وڅېړل شي.
دغه امریکایي چارواکي زیاته کړې: «ایرانیانو ویلي چې تر راتلونکو دوو اوونیو به له مفصلو وړاندیزونو سره راستانه شي، ترڅو زموږ په دریځونو کې ځینې پاتې شته واټنونه او اختلافونه لهمنځه یوسي».
اخوا، والسټریټ ژورنال ورځپاڼې بیا راپور ورکړی چې ایران وړاندیز کړی څو د یورانیمو غني کول تر درېیو کلونو پورې ودروي، د لوړې کچې غني شویو یورانیمو د زېرمو یوه برخه بهر ته ولېږدوي او له متحده ایالاتو سره د اټومي مذاکراتو د پرمخ وړلو لپاره سوداګریزو معاملاتو ته داخل شي.
د دې راپور لهمخې، په دغو وړاندیزونو کې د یورانیمو د غني کولو بشپړ درول شامل نه دي؛ هغه غوښتنه چې د ډونالډ ټرمپ له اصلي غوښتنو څخه ده.
دې ورځپاڼې لیکلي، ایران همداراز اعلان کړی چې چمتو دی څو د خپلو یورانیمو د زېرمو یوه برخه د روسیې په څېر یو لوري ته ولېږدوي او د بندیزونو د لیرې کېدو په صورت کې له امریکا سره د تېلو، ګازو، کانونو او هوايي چلند په برخو کې پر احتمالي همکاریو خبرې وکړي.
په راپور کې راغلي، چې امریکایي چارواکو د بندیزونو د کمولو د کچې په اړه جزیات نه دي ورکړي او دا مهال د بندیزونو پراخ لیرې کول د واشنګټن په کاري اجنډا کې نشته.
