ملګرو ملتونو کې د امریکا سفیر: ډونالډ ټرمپ ډیپلوماسي د پوځي ملاتړ په مټ پر مخ وړي
د ملګرو ملتونو سازمان کې د امریکا سفیر مایک والټز ویلي، ډونالډ ټرمپ چمتو دی چې د ایران پروړاندې پرېکنده اقدام وکړي، خو ډیپلوماسۍ ته یې لومړیتوب ورکړی دی.
والټز د سېشنبې په ورځ فاکس بېزنس ته وویل، چې د سختو فشارونو کمپاین او ورپسې د ملګرو ملتونو د بندیزونو بېرته راګرځولو د ایران اقتصاد منزوي کړ. دغه وضعیت د یاد هېواد د ملي پیسو ارزښت په شدت سره راښکته کړ، چې په پایله کې یې پراخ اعتراضونه راوپارېدل.
هغه زیاته کړه، هغه څه چې رژیم ورته تر هر څه زیات ارزښت ورکوي، پیسې دي. سپاه پاسداران د ایران د اقتصاد کابو نیمایي برخه په خپل کنټرول کې لري او همدا چاره دوی ته دا امکان ورکوي، چې پر خلکو سخت کنټرول ولري.
په ملګرو ملتونو کې د امریکا سفیر له ایران سره د خبرو اترو د دوام په اړه د خپل حکومت دریځ داسې بیان کړ: «ډونالډ ټرمپ تل ډیپلوماسۍ ته لومړیتوب ورکوي، خو دا ډیپلوماسي د امریکا د متحدو ایالتونو د پوځ په واقعي ځواک ولاړه ده؛ لکه څنګه چې د ایران پر اټومي تاسیساتو په عملیاتو کې نړۍ ته وښودل شول چې دا ځواک څومره اغېزناک ثابتېدای شي».
والټز زیاته کړه: «ایران باید د غني کولو وړتیا یوې خوا ته پرېږدي او خپل غني شوي او په لوړه کچه غني شوي یورانیم وسپاري. د وسلو له جوړولو پرته د غني کولو د داسې کچې لپاره بل هېڅ دلیل شتون نه لري. همدارنګه د ترهګرو ملاتړ او د ایران د لیرې واټن ویشتونکو بالسټیک توغندیو پروګرام هم له هغو موضوعاتو څخه دي، چې موږ په ښکاره ویلي چې د خبرو پر مېز اېښي دي. باید وکتل شي چې څه به پېښ شي. دوی باید غوږ ونیسي ځکه کله چې ولسمشر وايي، چې غوڅ اقدام به وکړي، هدف یې دقیقا همدغه دی».
