فرح پهلوي: د ایرانیانو یووالی، زړورتیا او وطن دوستي هېڅ ځواک نه‌شي ماتولی

فرح پهلوي پر اېکس پاڼه د نړۍ په ګڼو ښارونو کې د روانو لاریونونو ستاینه کړې ده. نوموړې لیکلي:« له ډېر ویاړ او خوښۍ سره مې د نړۍ په ګوټ، ګوټ کې هغه لاریونونه وڅارل، چې د شاهزاده رضا پهلوي په بلنه او ستاسو د بې‌ساري یووالي او زړورتیا په پایله کې ترسره شوي».

هغې یادونه کړې، چې له ملبورن نه تر مونيخ، له لندن نه تر ټورنټو او له واشنګټن نه تر لاس‌انجلس او نورو ښارونو پورې یو مېلیون ایرانیانو خپله مینه او وطن دوستي څرګنده کړه. هغې په ځانګړې توګه د هغو کسانو یادونه وکړه، چې د ایران حکومت له لوري وژل شوي او یا زنداني شوي دي.

فرح پهلوي زیاته کړې:« هغه بېرغونه چې مو پورته کړل او هغه شعارونه چې مو ورکړل، د ټینګې ارادې څرګندونه کوي. غواړم پوه شئ، چې ما دغه ویاړ او عظمت ولیده».

هغې ویلي، چې د ملت اراده د ایران د ازادۍ لپاره یوه هیله بښونکې نښه ده. نوموړې څرګنده کړې:« زه باور لرم، چې د دغه ډول ملي ارادې په پایله کې ایران به ژر له ظلم کوونکو خلاص شي. زه په تاسو ویاړم او له تاسو څخه د زړه له کومې مننه کوم».