د پاکستان د کورنیو چارو وزیر محسن نقوي د سېشنبې په ورځ په لاهور کې یوې خبري ناستې ته د وینا پر مهال په خېبرپښتونخوا او بلوچستان ایالتونو کې د ناامنیو پر زیاتېدو اندېښنه څرګنده کړه او خبرداری یې ورکړ، چې په خېبرپښتونخوا کې د ناامنیو لمن د پراخېدو په حال کې ده.
نوموړي د خېبرپښتونخوا پر حکومت سختې نیوکې وکړې او ویې ویل، چې «په دغه ایالت کې هره ورځ یوه پېښه رامنځته کېږي».
که څه هم د پاکستان د کورنیو چارو وزیر د وسلهوالو ډلو پروړاندې د خېبرپښتونخوا د پولیسو مبارزه وستایله، خو ویې ویل چې «د سیاسي مشرتابه له ملاتړ پرته به هېڅ مبارزه بریا ته ونه رسېږي».
نقوي په بلوچستان کې هم امنیتي وضعیت «ناوړه» وباله او ویې ویل، هغه کسان چې د ډیجیټلي پلټفورمونو له لارې د حکومت د چارو د ګډوډولو هڅه کوي، د عامه ګټو پر ضد عمل کوي. نوموړي زیاته کړه: «دا کومه عادي پېښه نه ده. که څوک هوښیار وي او وضعیت په روښانه توګه وګوري، باید منطقي حللاره وړاندې کړي».
د پاکستان د کورنیو چارو وزیر هم د دې هېواد د نورو چارواکو په څېر یو ځل بیا پر هند تور پورې کړ، چې په دغو دواړو ایالتونو کې د وروستیو ترهګریزو بریدونو تر شا لاس لري. نوموړي وویل، هند ځان قرباني ښيي خو په ورته وخت کې دغه بریدونه تنظیموي.
نقوي دغه څرګندونې په داسې حال کې کوي، چې یوازې یوه ورځ وړاندې د خېبرپښتونخوا په باجوړ سیمه کې پر یوې امنیتي پوستې د موټربم برید له امله ۱۱ امنیتي سرتېري او یو ماشوم ووژل شول. د پاکستان پوځ ادعا کړې، چې په ځوابي برید کې یې ۱۲ وسلهوال مخالفین وژلي دي.
یاده دې وي، چې د دې برید مسوولیت ټيټيپي پر غاړه اخیستی دی.
دا برید له افغانستان سره د پاکستان پر سرحدي سیمو د تاوتریخوالي د پراخې څپې یوه برخه ده. د څېړنیزو بنسټونو د راپورونو لهمخې، ۲۰۲۵ کال په وروستۍ یوه لسیزه کې د پاکستان لپاره یو له خونړیو کلونو څخه و. د دغو تاوتریخوالو ۹۵ سلنه په خېبرپښتونخوا او بلوچستان کې ثبت شوي دي او دا هغه دوه ایالتونه دي، چې د افغانستان پر پوله پراته دي.
