په خیبرپښتونخوا کې د پاکستان امنیتي ځواکونو او وسلهوالو ترمنځ نښته کې درې پاکستاني ځواکونه او درې وسلهوال وژل شوي دي. دغه نښته د کبل ګرام په پېچلې غرنۍ سیمه کې د پاکستاني پوځ د یو لړ عملیاتو پرمهال شوې ده.
د پاکستان امنیتي ادارو د سېشنبې په ورځ ویلي، دغه عملیات د پولیسو او ترهګرۍ ضد ځانګې لهخوا په ګډه ترسره شوي چې درې وسلهوال پهکې وژل شوي دي. پاکستانۍ رسنۍ جیونیوز راپور ورکړی، په دغه عملیاتو کې یې د وسلهوالو مشر نور اسلام هم وژلی چې د لهمنځه وړلو لپاره یې ۵۰ لکه کلدارې جایزه اېښودل شوې وه.
جیونیوز د پاکستان امنیتي سرچینو په حواله لیکلي، چې په دغه عملیاتو کې د وسلهوالو په ډزو کې مقبول احمد، فدا حسین او سعید الرحمان په نومونو درې امنیتي ځواکونه هم وژل شوي دي. د پاکستان امنیتي ادارو ویلي، چې په سیمه کې به یې د وسلهوالو د ځپلو لپاره عملیات دوام ولري.
تر اوسه د دغه نښتو په اړه کومې وسلهوالې ډلې څه نهدي ویلي.
