په کندوز ولایت کې د ۶۵ چاپاندازانو په ګډون د وزلوبې سیالۍ ترسره شوې
د کندوز په امام صاحب ولسوالۍ کې د ۶۵ چاپاندازانو په ګډون د وزلوبې سیالۍ ترسره شوې. په دغو سیالیو کې د کوربه چاپاندازانو سربېره، د تخار ولایت لوبغاړو هم برخه اخیستې وه.
په پای کې، لوبغاړو په دوو وروستیو پړاوونو کې هم سره سیالۍ وکړې او غوره لوبغاړي وتوانېدل چې حلالې دایرې ته یې ورسوي.
د سیالۍ داورانو د دوو وروستیو پړاوونو پایلې اعلان کړې، چې په لومړي وروستي پړاو کې پهلوان دادالله د دې پړاو جایزه په خپل نوم کړه. په دویم وروستي پړاو کې بیا پهلوان سلام له نورو چاپاندازانو څخه مخکې شو او تر ټولو وړاندې یې وزه حلالې دایرې ته ورسوله او د دې پړاو ګټونکی شو.
د دې سیالیو تنظیموونکو د دغه پروګرام موخه د ملي او دودیزو لوبو ترویج، د بومي کلتور ژوندي ساتل او خلکو او د ورزش مینهوالو ته د سالمې ساتیرۍ رامنځته کول ښودلي دي.
