د طالبانو د کورنیو چارو وزارت ویلي، چې د کابل ښار په بېلابېلو سیمو کې د نشهیي توکو پر وړاندې د مبارزې پولیسو د تېرو اوو ورځو په ترڅ کې ۱۲۳کسان د نشهیي توکو د قاچاق او پلور په تور نیولي دي.
د دغه وزارت په خپره شوې خبرپاڼه کې راغلي، چې یاد کسان د جلا عملیاتو پر مهال نیول شوي او له لومړنیو څېړنو وروسته به یې دوسیې عدلي او قضايي ارګانونو ته وسپارل شي.
د خبرپاڼې له مخې، له نیول شویو کسانو څخه له دوه زرو زیات نشهیي ټابلیټونه، چې «کا» بلل کېږي، ۱۵کیلوګرامه چرس او همداراز یوه اندازه تاریاک، شیشه او الکولي مشروبات هم ترلاسه شوي دي.
د طالبانو د کورنیو چارو وزارت ویلي، چې د نشهیي توکو پر وړاندې د مبارزې عملیات به یې دوام ولري او هغه کسان به ونیول شي چې د دغو موادو په قاچاق او پلور کې لاس لري.
سره له دې چې طالبان وخت ناوخت د نشهیي توکو پر وړاندې د عملیاتو او نیونو خبر ورکوي، خو یو شمېر شنونکي او منتقدان وایي چې دا مبارزه تر ډېره په ټیټه کچه محدوده ده. د دوی په وینا، ډېری نیول شوي کسان واړه پلورونکي یا منځني قاچاق کوونکي وي، خو لوی قاچاق کوونکي او پراخې شبکې یې لا هم په پراخه کچه فعالیت کوي.
