د سوډان پر یوه بازار د بېپیلوټه الوتکې په برید کې لږترلږه ۲۸ کسان وژل شوي
د بشري حقونو یوې ډلې ویلي، چې د سوډان په مرکزي کوردوفان سیمه کې د بېپیلوټه الوتکې برید لږترلږه ۲۸ کسان وژلي او لسګونه نور یې ټپیان کړي دي. یادې ډلې د دوشنبې په ورځ په یوه بیان کې ویلي، دغه برید د شمالي کوردوفان ایالت د سوداري ښار پر الصفیه بازار شوی دی.
یادې ډلې زیاته کړې، ښایي د مرګژوبلې شمېر تر دې لوړ شي. یاده سیمه دا مهال د سوډان د چټک ملاتړ ځواکونو تر ولکې لاندې ده. په سوډان کې د پوځ او د چټک ملاتړ ځواکونو (RSF) ترمنځ جګړه د ۲۰۲۳کال د اپرېل په ۱۵مه پیل شوه، چې لاهم دوام لري.
په سوډان کې روانې درې کلنې جګړې شاوخوا ۱۴ مېلیونه خلک بېځایه کړي او او ۲۱ مېلیونه یې له سختې لوږې سره مخ کړي دي. د راپورونو له مخې؛ د جګړې د دوام له امله مرستو ته د اړمنو خلکو لاسرسی خورا محدود شوی دی.
