افغان سوک وهونکي فواد عمرزاده د سوېډن اتلولي وګټله
افغان سوک وهونکی فواد عمرزاده د سویډن د تنکیو ځوانانو د سوک وهنې په سیالیو کې ښه وځلېده او د یادو سیالیو اتلولي یې خپله کړه. دغه سیالۍ د سویډن په هور ښار کې ترسره شوې او عمرزاده د ۵۴ کیلوګرامه وزن په کټګورۍ کې خپلو درېیو سیالانو ته ماتې ورکړه او لومړی مقام یې خپل کړ.
دغه ځوان لوبغاړي په لومړۍ لوبه کې سهیل ناصر ته ماتې ورکړه او په دویمه لوبه کې یې ماهر نیهمه ته ماتې ورکړه او د سیالیو وروستي پړاو ته یې لاره وموندله. د یادو سیالیو په پای لوبه کې فواد عمرزاده د اورینا لېنډسټروم سره مخامخ شو او د غوره فعالیت سره یې د سیالۍ د سرو زرو مډال وګاټه.
دا د سویډن د تنکیو ځوانانو د سوک وهنې سیالیو په ډلبندۍ کې د فواد عمرزاده څلورمه اتلولي ده. هغه تراوسه پورې په خپل ورزشي مسلک کې ۲۶ بریاوې او یوازې یوه ماتې ثبت کړې ده او په بهر کې د افغانستان د سوک وهنې برخې له ښو استعدادونو ګڼل کېږي.
