افغانستان د ۲۰۲۶ کال د کرېکټ له ۲۰ اوریز نړۍوال جام څخه حذف شو
د کاناډا پروړاندې د نیوزیلنډ د کرېکټ ملي لوبډلې په بریا سره، د افغانستان د کرېکټ ملي لوبډله د شلاوریز نړۍوال جام له سیالیو حذف شوه. نیوزیلنډ د دغو سیالیو د څلورم ګروپ په خپلې وروستۍ لوبه کې کاناډا ته د ۸ وېکټو په توپیر ماتې ورکړه.
نیوزیلنډ په دې بریا سره ۶ امتیازونه ترلاسه کړل او د جدول په دویم ځای کې په راتلو سره بل پړاو ته لار وموندله.
په دغه لوبه کې کاناډا پچه وګټله او لومړی یې د توپوهنې پرېکړه وکړه. دغې لوبډلې په ۲۰ اورونو کې د ۴ وېکټو په زیان سره د ۱۷۴ منډو هدف وټاکه. یوراج سامرا د ۱۱۰ منډو په جوړولو سره د کاناډا تر ټولو مخکښ لوبغاړی و.
په ځوابي لوبه کې، نیوزیلنډ په ۱۵.۱ اورونو کې د یوازې دوو وېکټو په زیان سره ۱۷۶ منډې جوړې کړې او بریا یې خپله کړه. ګلین فلېپس د ۷۶ منډو په جوړولو سره هدف ته د خپلې لوبډلې په رسولو کې کلیدي رول ولوباوه.
د دغې لوبې په پای ته رسېدو سره، له څلورمې ډلې څخه د نړۍوال جام اته غوره لوبډلې هم وپېژندل شوې. سوېلي افریقا له درېیو پرلهپسې بریاوو وروسته له وړاندې د سرلارې لوبډلې په توګه خپل ګډون یقیني کړی و او نیوزیلنډ هم د شپږو امتیازونو په ترلاسه کولو سره د څلورمې ډلې د دویمې لوبډلې په توګه بل پړاو ته لاره وموندله.
له دې سره، د افغانستان، متحده عربي اماراتو او کاناډا لوبډلې له سیالیو څخه حذف شوې. افغانستان او اماراتو دواړو د درېیو لوبو په ترسره کولو سره یوازې دوه دوه امتیازونه ترلاسه کړي دي. د دغې ډلې وروستۍ لوبې چې د افریقا پر وړاندې د اماراتو او د کاناډا پر وړاندې د افغانستان ترمنځ دي، تشریفاتي بڼه لري او پایلې به یې بل پړاو ته د صعود پر برخلیک هېڅ اغېز ونهکړي.
