په جېنوا کې د ایران او امریکا ترمنځ خبرې پیل شوې
د ایران دولتي ټلوېزیون خبر ورکړی، چې د ایران او امریکا ترمنځ د خبرو اترو دویم پړاو په جېنوا کې پيل شو. په خبر کې ویل شوي، چې دغه ناسته د ایران پر وخت د سهار په نهه بجو په سویس کې د عمان په سفارت کې پيل شوه.
د ایران د بهرنیو چارو وزیر عباس عراقچي له امریکا سره د خبرو اترو د دوام لپاره جېنوا ته له رسېدو وروسته پر اېکس پاڼه لیکلي، چې هغه دلته د «عادلانه او متوازنې» هوکړې د ترلاسه کولو لپاره له «رېښتینو نوښتونو» سره راغلی دی.
تر دې مخکې د امریکا ولسمشر ډونالډ ټرمپ هم اعلان کړی و، چې د تهران اټومي پروګرام په اړه د متحده ایالاتو او ایران ترمنځ مذاکراتو کې به په «نامستقیمه» توګه ګډون ولري. هغه زیاته کړه: «هیله لرم، چې ایران په معقوله بڼه عمل وکړي. فکر نه کوم چې ایران وغواړي د هوکړې د نه ترلاسه کېدو له پایلو سره مخ شي». هغه په جېنوا کې د سېشنبې په ورځ کېدونکي مذاکرات خورا مهم وبلل او زیاته یې کړه: «ایران د هوکړې غوښتونکی دی».
