د افغانستان د رزمي لوبو (MMA) لوبغاړي فیاض حق پرست د «We Love MMA» سازمان د سیالیو په ۸۵م پړاو کې د لومړۍ پاڼۍ په ۱۷مه ثانیه کې د صربستان زلتان سېګیدي ته ماتې ورکړه. دغه لوبه د جرمني په مونیخ کې ترسره شوه او ټاکل شوې وه، چې تر درېیمې پاڼۍ پورې دوام وکړي.
دغه لوبه د فیاض حق پرست لهخوا له یوې سختې ضربې سره پیل شوه، هغه ضربه چې د صربستان لوبغاړي خپل توازن له لاسه ورکړ او وروسته یې زنګون سخت ټپي شو. لوبڅار د سېګیډي وضعیت ته په کتو په هماغه لومړیو ثانیو کې لوبه ودروله.
د یادې لوبې پایله لاهم په مشهورې وېبپاڼه تاپولوژي کې د فیاض حق پرست په ګټه د تخنیکي ناکاوټ (TKO) په توګه ثبت شوې ده. ۲۴کلن افغان لوبغاړی فیاض حق پرست چې په جرمني کې ژوند کوي، د اماتور ۱۰ لوبې یې کړې او ټولې یې ګټلې دي.
تر دغه لوبې وړاندې نوموړي د MMA په مسلکي څانګه کې یوه بریا لرله او له یادې بریا سره هغه خپله دویمه مسلکي بریا هم ونمانځله. له بل پلوه د صربستان تجربه لرونکي لوبغاړي زلتان سېګیدي په ۲۰ مسلکي سیالیو کې برخه اخیستې وه، چې ۵ یې ګټلې او ۱۵ یې بایللې وې. له دې ماتې سره هغه خپله ۱۶مه مسلکي ماتې هم تجربه کړه.
