د خیبر پښتونخوا په ډېره اسماعیل خان کې وسلهوالو د ګمرک په دفتر او پولیسو برید کړی، چې له امله یې ۲ کسه وژل شوي او ۳ نور ټپیان دي. د خیبر پښتونخوا د پولیسو ویاند ویلي، وسلهوالو د شپې ناوخته د «یارک» پولیسو پر پوستې ډزې وکړې چې له امله یې یو پولیس افسر ووژل شو او ۲ نور ټپیان شول.
د هغه په وینا؛ ټپیان د درملنې لپاره نږدې روغتون ته لېږدول شوي دي. نوموړي زیاته کړې، په همدې پېښه کې بریدګرو د پوستې ترڅنګ پر ګمرک دفتر هم برید وکړ چې له امله یې د ګمرک یو چارواکی ووژل شو او یو بل ټپي شو.
راپورونه ښيي، چې د یاد ګمرک یو بل کارکوونکی تری تم دی او د موندلو هڅې یې روانې دي. وسلهوالو په دغه برید کې دوه دولتي موټرونه هم ویجاړ کړي.
له پېښې وروسته سیمه د پاکستان امنیتي ځواکونو لهخوا کلابنده شوې او چاڼیز عملیات هم پیل شوي دي. چارواکي وایي، د بریدګرو د نیولو هڅې لاهم روانې دي او د پېښې په تړاو پلټنې دوام لري.
په سیمه کې لوړ امنیتي تدابیر اعلان شوي دي.
