د طالبانو تر واک لاندې برېښنا شرکت ویلي، چې له ايران سره یې د ۱۴۰۵ لمريز کال لپاره د برېښنا د پېر تړون تمديد کړی. دغه شرکت نن چهارشنبه (د سلواغې ۲۹مه) د يوې خبرپاڼې په خپرولو سره ويلي، دغه تړون تهران ته د برېښنا شرکت د يوه پلاوي د سفر پرمهال له ايراني چارواکو سره لاسليک شوی.
د خبرپاڼې له مخې؛ د برېښنا شرکت ریس عبدالحق همکار چې د ياد پلاوي مشري یې کوله، په تهران کې د ايران د برېښنا د لېږد او وېش شرکت له مسوولينو سره د یوې ناستې پرمهال په دې اړه خبرې کړې دي.افغانستان تر ډېره پر وارداتي برېښنا تکيه لري. اوسمهال په کور دننه شاوخوا ۲۰۰ مېګاواټه برېښنا توليدېږي؛ خو د برېښنا شرکت د معلوماتو له مخې د هېواد اړتیا نږدې ۷زره مېګاواټو ته رسېږي.افغانستان خپله برېښنا له ازبکستان، تاجکستان، ترکمنستان او ایران څخه واردوي. له ازبکستان نه وارداتي برېښنا د افغانستان د انرژۍ له مهمو سرچينو ګڼل کېږي او د کابل په ګډون يوشمېر نور ولايتونه تر ډېره پر همدې سرچينه تکيه لري.
