د طالبانو د کلیو د بیارغونې او پراختیا وزارت خبر ورکړی، چې د پروان ولایت په شینوارو او سالنګ ولسوالیو کې د ۲۷۰ مېلیون افغانیو په لګښت ۱۸۳ پراختیایي پروژې بشپړې او ګټې اخیستنې ته سپارل شوې دي.
دغه وزارت نن چهارشنبه (د سلواغې ۲۹مه) د یوې خبرپاڼې په خپرولو سره ویلي، یادې پروژې د دواړو ولسوالیو په ۱۶۵ کلیو کې پلي شوې دي چې شاوخوا ۲۴زره او ۷۰۰ کورنۍ ترې برخمنې شوې دي.د خبرپاڼې له مخې؛ په دغه پروژو کې د سړکونو جوړول، د اوبو رسولو شبکې، استنادي دېوالونه، پلونه او د خوراکي توکو وېش شامل دی. د طالبانو د کلیو د بیارغونې او پراختیا وزیر عبداللطیف منصور ویلي، دغه پروژې د یاد وزارت تر لارښوونې لاندې د «اکټېد» موسسې له لوري پلي شوې او مالي ملاتړ یې د نړۍوال بانک لهخوا شوی دی.
دغه وزارت ادعا کړې ده، چې د یادو پروژو د تطبیق پرمهال ۱۷زره او ۶۳۰ کسانو ته د کار زمینه هم برابره شوې وه.
