د پاکستان د سوداګرۍ وزیر جام کمال خان د سېشنبې په ورځ وویل، چې له افغانستان سره د تعامل شرط دا دی چې لومړی باید د ترهګرۍ مسله حل شي. نوموړي په خپل اېکس کې لیکلي، چې له افغانستان سره اړيکې د ترهګرو د پټنځایونو تر لهمنځه وړلو پورې نه عادي کېږي.
د پاکستان د سوداګرۍ وزیر همداراز زیاته کړې، چې د دوه اړخیزې سوداګرۍ د بیا پیلولو په ګډون له طالبانو سره هر ډول تعامل د افغانستان په خاوره کې د مېشتو وسلهوالو پروړاندې د دغې ډلې په عملي ګامونو پورې تړلی دی. هغه وویل، چې د هېواد لومړیتوب یې امنیت دی.
جام کمال خان په دغه پیغام کې لیکلي: «که چېرې له افغانستان سره تعامل کوو، نو لومړی باید د ترهګرۍ مسله حل شي، ځکه په وروستیو میاشتو کې په دې برخه کې ډېرې پېښې شوې دي او ان زیاتوالی هم پهکې راغلی دی».
نوموړی دغه څرګندونې داسې مهال کوي، چې طالبانو تل د پاکستان دا تورونه رد کړي او ویلي یې دي، چې د افغانستان خاوره د ګاونډیو او سیمې د هېوادونو پروړاندې نه کارول کېږي. خو پاکستان وايي، چې طالبان د پاکستاني طالبانو تحریک (ټيټيپي) او بلوڅ بېلتون غوښتونکو په څېر ډلو ته پټنځایونه ورکوي.
د پاکستان د سوداګرۍ وزیر بیا څرګنده کړه: «موږ د خپل امنیت پر سر روغه جوړه نه کوو. هغه ترهګر چې د افغانستان له خاورې ګټه اخلي، باید کنټرول شي او دا زموږ لومړیتوب دی».
هغه ټینګار وکړ، چې پاکستان د خبرو اترو او د سوداګرۍ د پراخولو هرکلی کوي، خو په داسې حال کې چې په افغانستان کې د وسلهوالو لپاره خوندي پټنځایونه شتون ولري نو نهشي کولای دې لارې ته دوام ورکړي. جام کمال خان زیاته کړه: «اقتصادي مسایل مهم دي، خو زموږ امنیت او حاکمیت په لومړیتوب کې دی».
دا په داسې حال کې ده، چې د دواړو لوریو اړيکې د ۲۰۲۵ کال په اکټوبر کې له سختو سرحدي نښتو وروسته ترینګلې شوې دي. اسلاماباد د افغانستان پر خاوره له بمبارۍ وروسته له دغه هېواد سره سوداګریزې اړيکې وځنډولې. له دې سره سم بیا طالبانو هم ګام پورته کړ او له پاکستان څخه یې د درملو د واردولو د بندولو امر وکړ. دغې ډلې هڅه کړې، چې هند، ایران او د منځنۍ اسیا هېوادونه د پاکستان د ټرانزیټي لارو او توکو پر ځای د بدیل په توګه وکاروي.
له میاشتو راهیسې د تورخم او چمن په څېر مهمې لارې تړل شوې دي. دې وضعیت د پولې دواړو غاړو سوداګرو، د باروړونکو موټرو چلوونکو او بزګرانو ته جدي ستونزې جوړې کړې دي. د سوداګرۍ درېدو د سلګونو میلیونو ډالرو په ارزښت د توکو لېږد رالېږد ځنډولی او په تېرو میاشتو کې زرګونه کانتینرونه تر پولې پورې ایسار پاتې دي.
