زېلېنسکي: امريکا اوکراين ته په اروپا کې د توغنديو د توليد اجازه ورنه کړه
د اوکراین ولسمشر ولادیمیر زېلېنسکي ویلي، سره له دې چې په اروپا کې د پاتريوت هوايي دفاعي سيستم ضد توغنديو د توليد لپاره له وړاندې پلانونه اعلان شوي وو؛ خو د امريکا لهخوا د تولید اجازه نهده ورکړل شوې. هغه ويلي، چې د جواز د ورکړې ژمنې شوې وې؛ خو امريکا پرې عمل ونه کړ.
زېلېنسکي د سېشنبې په ورځ (د سلواغې ۲۸مه) په يوه ويډيويي پیغام کې وويل:« اوکراين له امريکا سره په اروپا کې د کافي شمېر توغنديو د توليد په اړه په ځانګړي ډول د پاتريوت سيستم لپاره خبرې کړې دي. موږ هم په خپله اوکراين کې او هم په سيمه کې د ناټو له شريکانو رومانيا او پولنډ سره د ګډ توليد وړانديز کړی و. د جواز د ورکړې ژمنې شوې وې؛ خو امریکا په پای کې پرې عمل ونه کړ».
هغه ټينګار وکړ، چې د روسيې د بريدونو پر وړاندې د خلکو د ساتنې لپاره بايد د پاتريوت سيستم ضد توغندي په واک کې ولري. د اوکراين ولسمشر هېوادونو ته په خطاب کې وويل، هر هغه څه چې اوس د هوايي دفاع په پروګرام کې شامل دي؛ بايد ژر تر ژره عملي شي.
دغه څرګندونې داسې مهال کېږي، چې د امريکا، اوکراين او روسيې ترمنځ دوه ورځنۍ خبرې اترې د سېشنبې په ورځ (د سلواغې ۲۸مه) په جېنوا کې پيل شوې دي.
