یونېسف له ایران څخه غوښتي چې د لاریونونو پرمهال نیول شوي ټول ماشومان خوشې کړي
د ملګرو ملتونو د ماشومانو د ملاتړ صندوق یا یونېسف په ایران کې د وروستیو لاریونونو پر مهال د نیول شویو ماشومانو په اړه ژوره اندېښنه ښودلې او له ایران څخه یې غوښتنه کړې، چې ژر تر ژره دې نیول شوي ماشومان خوشې کړي.
د ملګرو ملتونو د ماشومانو د ملاتړ وجهي صندوق د پنجشنبې په ورځ (د سلواغې ۳۰مه) د یوې اعلامیې په خپرولو سره په ایران کې د وروستیو لاریونونو پر مهال د نیول شویو ماشومانو د ژر تر ژره خوشې کېدو غوښتنه کړې ده.
د ملګرو ملتونو یادې ادارې له ایران څخه غوښتنه کړې، چې خپلواکو بنسټونو ته دې اجازه ورکړي، څو د نیول شویو ماشومانو روغتیايي او رواني وضعیت له نږدې وګوري.
د یونېسف په اعلامیه کې راغلي: «ایران د ماشومانو د حقونو نړۍوال کنوانسیون لاسلیک کړی او د قانون لهمخې، مکلف دی، چې د ماشومانو خوندیتوب تضمین کړي. ایران باید ژر تر ژره نیول شوي ماشومان له زندانه ازاد کړي».
د ملګرو ملتونو یادې ادارې خبرداری ورکړی، چې زندان او توقیف د ماشومانو پر راتلونکي شخصیت او پرمختګ ویجاړونکې او تلپاتې اغیزې پرېږدي او ټینګار کوي، چې ماشومان باید په هېڅ ډول د لویانو په څېر په زندانونو کې ونهساتل شي.
لا تر اوسه په کره توګه روښانه نهده، چې په ایران کې د پراخو لاریونونو پر مهال څومره ماشومان نیول شوي او لا هم بندیان دي.
