سيبياېس نیوز راپور ورکړی، چې د امریکا د ملي امنیت لوړپوړو چارواکو د چهارشنبې په ورځ په یوه غونډه کې ډونالډ ټرمپ ته ویلي چې پوځ چمتو دی له شنبې نه پر ایران بریدونه پيل کړي. ځینو سرچینو ویلي، د هر احتمالي اقدام مهالوېش ښايي راتلونکې اونۍ وي.
د دغه چارواکو په وینا؛ ټرمپ لاهم د پوځي برید په اړه وروستۍ پرېکړه نهده کړې او سپینه ماڼۍ د تاوتریخوالي د زیاتېدو ګواښونه او دارنګه د اقدام نهکولو سیاسي او پوځي پایلې ارزوي.
سيبياېس همدارنګه د څو چارواکو په حواله راپور ورکړی، چې پنټاګون به د احتمالي غچاخیستونکو بریدونو د ګواښ کمولو لپاره په راتلونکو درېیو ورځو کې له منځني ختیځ نه د خپلو ځواکونو یوه برخه وباسي.
یوې سرچینې ټینګار وکړ، چې د امریکا د احتمالي پوځي اقدام څخه مخکې د تجهیزاتو او سرتېرو لېږدول د پنټاګون معیاري عمل دی او دا پر ایران د نږدې برید په معنا نهدی. سياېناېن چې د شنبې په ورځ یې د امریکا د پوځي چمتووالي په اړه ورته راپور خپور کړ د یوې سرچینې په حواله ویلي، چې ټرمپ له خپلو سلاکارانو سره د پوځي برید د ګټو او زیانونو په اړه بحث کړی او د ایران په وړاندې یې د غوره اقدام په اړه د امریکا له متحدینو څخه نظرونه غوښتي دي.
