د کرملین ماڼۍ ویاند ویلي، چې له اوکراین سره د سولې د خبرو اترو د راتلونکي پړاو ځای او وخت په اړه پرېکړه به په جنیوا کې د وروستیو دوه ورځنیو مذاکراتو له ارزونې وروسته وشي.
د کرملین ماڼۍ ویاند دیمیتري پسکوف د پنجشنبې په ورځ (د سلواغې ۳۰مه) په مسکو کې خبریالانو ته ویلي، چې روسیه دمګړۍ د هغو درې اړخیزو خبرو پایلو ارزونه کوي، چې د روانې اوونۍ د سهشنبې او چهارشنبې په ورځو کې په سویس کې تر سره شوې دي.
نوموړي زیاته کړې، چې د روسیې ولسمشر ولادیمیر پوتین ته له اوکراین سره د سولې په تړاو د ورستیو مذاکراتو بشپړ راپور وړاندې شوی او له یاد هېواد سره به د خبرو او راتلونکي اقدام پرېکړه د همدې راپور پر بنسټ تر سره شي.
پسکوف زیاته کړې:«روسیه او اوکراین د موضوع په حل کې د اروپايي ټولنې ګډون ته هېڅ اړتیا نهویني. اروپایان اوسمهال د مذاکراتو پر میز هیڅ حضور نهلري. روسیه په دې باور ده، چې د اروپا دریځ د سولې پر ځای د جګړې له دوام سره مرسته کوي او له اوکراین سره د راتلونکو مذاکراتو د وخت او ځای په اړه لا تر اوسه څه پرېکړه نهده شوې».
همدارنګه د کرملین ماڼۍ ویاند ویلي، چې په جنیوا کې له وروستیو درې اړخیزو مذاکراتو وروسته د روسیې او واشنګټن ترمنځ هېڅ اړیکه نهده نیول شوې او د راتلونکو مذاکراتو مهالوېش ټاکل په امریکايي لوري پورې اړه لري.
