د تاجکستان امنیتي کمېټې اعلان کړی چې د دغه هېواد په سرحدي سیمه کې یې له افغانستان نه قاچاق شوي۵۸ کیلوګرامه نشهيي توکي کشف او ضبط کړي دي. د تاجکستان دولتي ټلویزیون د چارشنبې په ورځ راپور ورکړ چې د دې قضیې په تړاو دوه تاجک وګړي، غلامعلي صابریف او سیفاللهیف نیول شوي دي.
د راپور له مخې، په ضبط شویو توکو کې ۳۰ کیلوګرامه تاریاک، ۱۹ کیلوګرامه چرس، او ۹ کیلوګرامه هېرویین شامل دي چې په تړاو یې دوه کسه چې ۵۷ او ۵۵ کلن دي، نیول شوي دي.
د تاجکستان امنیتي چارواکو زیاته کړې چې دغه نشهيي توکي د افغان قاچاقبرو له خوا د رسمي سرحدي لارو له لارې دغه هېواد ته انتقال شوي وو. ددغه هېواد د امنیتي کمېټې په وینا، تورنو کسانو پلان درلود چې یاد توکي لومړی د دوشنبې ښار ته ورسوي او بیا یې د خپلو شریکانو له لارې نورو هېوادونو ته ولېږدوي.
اړونده چارواکو ویلي چې نیول شوي کسان د قانوني څېړنو لپاره محکمې ته سپارل شوي چې د تاجکستان د قوانینو له مخې به په شل کلن بند محکوم شي.
سرچینو افغانستان انټرنشنل پښتو ته ویلي چې طالبانو د دولتي شرکتونو لوی ریاست د ابن سینا فارمسي دولتي شرکت ۴۲۰ کارکوونکي په کور کښېنولي دي. ګوښه شوي کارکوونکي وايي، چې ددوی تر واک لاندې درملتونونه د طالبانو اړوند چارواکو د کورنیو غړو او خپلوانو ته ورکړل شوي دي.
د سرچینې په وینا، له ټولو ۴۶۰ کارکوونکو څخه د یاد شرکت د رییس په ګډون ۴۰ کارکوونکي په دې شرکت کې پاتې دي، نور ټول له دندو لرې شوي دي.
طالبانو د دغو کارکوونکو درملتونونه ترې اخیستي او بولۍ ته یې ورکړي، خو خپله دوی په بولۍ کې د ګډون اجازه نه لري.
دغه کارکوونکي وایي چې ډېری کارکوونکو درملتونونه په خپل شخصي لګښت جوړ کړي دي او طالبان یې د لګښت پیسې هم نه ورکوي.
ددوی په وینا، پر هر درملتون اته سوه زره یا یو میلیون افغانۍ مصرف شوې، خو طالبانو ورته ویلي چې دا دولتي پیسې دي او دولت ته وقف شوې.
ګوښه شوي کارکوونکي شکایت کوي، چې طالبان دغه درملتونونه خپلو قوماندانانو ته ورکوي او بولۍ هسې نمایشي کار دی. یو تن وویل، « په ننګرهار کې یوه دواخانه یوه طالب لوګري او بله هم قاري محمد رهبر ته ورکړل شوې، چی دملا نیک محمد رهبر وراره دی».
دغه کارکوونکي وایي چې همدا بهیر روان دی او د بلخ حوزوي روغتون درملتونونه هم یو طالب چارواکي نیولي دي.
د سرچینې په وینا، د طالبانو د بهرنیو چارو وزیر امیرخان متقي خوریې چې نور الله نومیږي، د ننګرهار حوزوي روغتون کې څلور درملتونونه، یوه هم وزیر محمد اکبر خان روغتون کې، بل هم په هرات حوزوي روغتون کې په واک کې اخېستي دي.
هڅه مو وکړه چې د دې موضوع په اړه د طالبانو د روغتیا وزارت ویاند ډاکټر شرافت زمان نه معلومات واخلو، خو ځواب مو ترلاسه نه کړ.
د میدان ښار پخوانۍ ښارواله او د افغان مېرمنو د حقوقو فعاله ظریفه غفاري غیرمستقیم طالبانو ته په اشارې وايي، چې حکومتونه دې هغو رژیمونو ته مشروعیت ورکول بند کړي، چې مېرمنې له ټولنې وباسي. مېرمن غفاري تازه د کاسټاریکا د لومړنۍ ښځینه ولسمشرې په نامه نومول شوې جایزه ترلاسه کړې ده.
په تېر جمهوریت کې د میدان ښار ښاروالې نن بنجشنبه، د سلواغې پر ۳۰مه په اېکس کې لیکلي چې تېره اونۍ یې «BLISS 2026» یوه جایزه واخیسته، خو دا یوازې سمبولیکه شیبه نه ده او خپل سیاسي ارزښت لري.
مېرمن غفاري نیوکه کړې ده، چې افغان مېرمنې له ټولنې څخه اېستل کېږي، خو په نړۍ کې په دې تړاو سیاسي اراده ناکامه شوې ده.
د لورا چنجیلا په نوم د بشري حقونو، ازادۍ، دیموکراسۍ او عدالت کلنۍ جایزه تېره اونۍ د میدان ښار پخوانۍ ښځینه ښاروالې ته ورکړل شوه.
غفاري د لاتینې امریکا اړوند کاستاریکا هېواد کې د یادې جایزې د اخیستو پر مهال نړۍ او د بشري حقونو، دیموکراسۍ او عدالت دعوه لرونکي سیاستوال په منځنۍ اسیا کې په دوه مخي سیاست تورن کړل، ځکه ددې په وینا، دیموکراسي او بشري حقونه د شعار تر بریده پاتې شوي.
هغې وویل چې د ښځو په وړاندې په مرګونو افراطي پالیسیو پټه خوله پاتې کېدل تاریخي خیانت دی.
د لورا چینچیلا جایزه د نړۍ هغو ښځو ته ورکول کېږي چې د زړورتیا، صداقت، زغم، خواخوږۍ او هیلې بېلګې وي او د بشري حقونو، ازادۍ او عدالت لپاره خپلې مبارزې ته دوام ورکوي.
د پاکستان امنیتي سرچینو ویلي، چې په باجوړ کې د وروستي ځانمرګي برید عامل د طالبانو د ځانګړو ځواکونو غړی و. د سلواغې پر ۲۷مه، په باجوړ کې یو موټربم برید وشو، چې له امله یې ۱۱ پاکستاني پوځیان ووژل شول. د سرچینو په وینا، بریدګر په عبدالله ابوذر مشهور و او د بلخ اوسېدونکی و.
امنیتي سرچینو افغانستان انټرنشنل ته ویلي چې د دغه ځانمرګي بریدګر خپلوانو د پنجشنبې په ورځ، د سلواغې په ۳۰مه، په بلخ ولایت کې د سیداحمد لپاره د فاتحې مراسم ترسره کړي دي.
دغه ځانمرګي بریدګر د روانې اونۍ د دوشنبې په ورځ له چاودېدونکو توکو په ډک موټر د باجوړ په سیمه کې د پاکستاني سرحدي ځواکونو پر یوې پوستې برید وکړ.
د دې برید په تعقیب، د پاکستان د بهرنیو چارو وزارت په اسلاماباد کې د طالبانو د سفیر مرستیال احضار کړ. دغه وزارت طالب ډېپلوماټ ته د اعتراض رسمي یادښت وسپاره چې د باجوړ په برید کې د افغانستان له خاورې د استفادې په اړه یې پکې اندېښنه څرګنده کړې ده.
پاکستان د مرګونو ځانمرګو بریدونو له یوې څپې سره مخ دی.
په وروستۍ پېښه کې، په اسلاماباد کې پر یوه جومات د ځانمرګي برید له امله ۳۲ کسان وژل شوي دي.
پاکستاني چارواکو څو ځله ویلي چې په دغه هېواد کې مرګوني بریدونه په افغانستان کې طرحه کېږي. دوی افغان طالبان تورنوي چې د پاکستاني دولت ضد وسلهوالو، په ځانګړي ډول تحریک طالبان پاکستان، ته پناه ورکوي، خو طالبان دا تورونه ردوي.
د پاکستان د بهرنیو چارو وزارت ویاند طاهر اندرابي د پنجشنبې په ورځ د اونیز کنفرانس پرمهال د یوې پوښتنې په ځواب کې وویل چې که طالبان د پاکستان ضد ډلو پر وړاندې عملي اقدام ونه کړي، اسلاماباد به “ پر میز ټول انتخابونه” وساتي.
هغه زیاته کړې چې پاکستان تر اوسه له زغم څخه کار اخلي، خو که غوښتنې یې پوره نه شي، نور اقدامات هم په پام کې نیول کېدای شي.
تر دې وړاندېد پاکستان دفاع وزیر خواجه اصف هم یو وار بیا ویلي، چې طالبان باید په افغانستان کې مېشت وسلهوال مهار کړي. هغه خبرداری ورکړی، چې که طالبان د دغو ډلو پر ضد اقدام ونه کړي؛ نو پاکستان به په افغانستان کې له نورو هوايي بریدونو ډډه ونه کړي.
اندرابي زیاته کړه: «موږ نه شو کولای اجازه ورکړو چې زموږ خلک په بې رحمۍ سره ووژل شي. موږ د ځان د دفاع حق لرو، لکه څنګه چې دا حق موږ ته د ملګرو ملتونو د منشور د ۵۱مې مادې له مخې راکړل شوی دی».
د نوموړي په وینا، هر هغه اقدام چې د پاکستان له لوري د یادو ډلو پر ضد ترسره کېږي، د ځان د دفاع په چوکاټ کې به وي او موخه به یې د ملکي وګړو او امنیتي ځواکونو د ژوند خوندیتوب وي.
دا په داسې حال کې ده چې د سلواغې په ۲۷مه نېټه، د خیبر پښتونخوا په باجوړ کې یو موټربم برید وشو، چې له امله یې ۱۱ پاکستاني سرتېري ووژل شول.
د پاکستان د بهرنیو چارو وزارت د طالبانو یو ډیپلوماټ احضار کړ او په دې اړه یې خپله جدي اندېښنه څرګنده کړه.
په کابل کې ځینو افغانانو افغانستان انټرنشنل ته وویل، چې د پاکستان سفارت یوه ویزه په تور بازار کې له زرو ډالرو څخه تر ۱۵ سوه ډالرو پورې پلورل کیږي. ددغو افغانانو په وینا، په سفارت کې د مرکې پر وخت له ویزه اخېستونکو اقرار اخېستل کیږي چې له دوی ۱۵۰۰ افغانۍ اخیستل شوې.
یو شمیر افغانانو نن پنجشنبه، د سلواغې پر ۳۰مه وویل، چې نه یوازې دا چې په کابل کې د پاکستان سفارت وېزې په تور بازار کې په ډالرو پلورل کیږي، بلکې په ننګرهار، کندهار او بلخ ولایتونو کې د پاکستان د کونسلګریو ویزې هم په تور بازار کې په ډالرو پلورل کیږي.
د ترلاسه شو معلوماتو له مخې، د معتبرو روغتیايي ادارو د اسنادو په لرلو سره په کابل کې د پاکستان سفارت او ننګرهار کې کونسلګرۍ طبي ویزې له ۱۳ سوه ډالرو څخه تر ۱۵ سوه ډالرو پورې پلورل کېږي.
یو شمېر افغانانو وویل، چې په کندهار او بلخ ولایتونو د پاکستان کونسلګریو اړوند طبي ویزه له زرو ډالرو څخه تر ۱۲ سوه ډالرو پورې پلورل کېږي.
همدراز په په کابل کې د پاکستان سفارت او په ننګرهار، بلخ، کندهار کې ددغه هېواد د کونسلګریو د سیاحت ویزې له ۱۵ سوه ډالرو څخه پیل تر ۲ زرو ډالرو پورې په تور بازار کې پلورل کیږي.
یو شمیر افغانانو افغانستان انټرنشنل ته وویل، چې دوی مجبور دي ددې ویزو د اخیستو لپاره له هغو سیاحتي شرکتونو سره خبرې وکړي، چې د پاکستان له سفارت او یا هم له کونسلګریو سره ثبت دي.
د کابل یوه اوسېدونکي وویل:« ما د روغتیايي ویزې لپاره درخواست ولېږه او یو نیم زر افغانۍ مې ورکړې خو د څلورو میاشتو په تېریدو سره ویزه رانغله، بیا مې په کابل کې یو شرکت ته ۱۳ سوه ډالره ورکړل او بیا یې په یوه ورځ کې د پاکستان سفارت د انټریو لپاره وغوښتم او په هغه ورځ یې ویزه راکړه.»
نوموړی زیاتوي:« په انټریو کې یې له ما پوښتنه وکړه، چې د ویزې لپاره دې څومره پیسې ورکړې، ما ورته وویل یونیم زر افغانۍ او که ما چیرې ویلي وای چې له ما څخه یې ۱۳ سوه ډالره اخیستي، نو بیا یې زما ویزه ردوله.»
په کابل کې د پاکستان سفارت تر اوسه په رسمي ډول ددغو شکایتونو په اړه کوم غبرګون نه دی ښودلی.
په کابل او ننګرهار کې د ځینو سیاحتي شرکتونو مسوولانو هم تایید کړه، چې د پاکستان ویزې په تور بازار کې په ډالرو پلورل کېږي او هغه کسان چې په عادي ډول د ویزو لپاره غوښتنلیک ورکوي د هغوی ویزې تر میاشتو میاشتو وخت نیسي او بیا وروسته پسې رد کېږي.
ځینې افغانان له طالبانو غواړي، چې له پاکستاني چارواکو سره دې ددې ستونزې په اړه خبرې وکړي او په تور بازار کې دې د ویزو پلورلو مخه ونیسي.
د جمهوریت له ړنګېدو وروسته په افغانستان کې د پاکستان د ویزو په برخه کې شکایتونه زیات شوي دي او د طالبانو د نږدې پنځو کلونو په تیرېدو سره لاهم دا ستونزه نه ده اواره کړې.