ځايي چارواکو د پنجشنبې په ورځ وويل، دا پېښه هغه مهال رامنځته شوه چې د اوبلن ګاز وړونکې لارۍ د چيلي په پلازمېنه سانتياګو ښار کې پر بل مخ واوښته او وروسته درنه چاودنه رامنځته شوه. پولیس وایي، دې پېښه کې ۴ کسان مړه او ۱۷ نور ټپیان شوي دي.
د ځايي پوليسو مشر په يوې خبري ناسته کې وويل، چې د لارۍ چلوونکي د موټر کنټرول له لاسه ورکړی و او تر چپه کدو وروسته چاودنه رامنځته شوې ده. د چارواکو په وينا، په مړه شویو کسانو کې د لارۍ چلوونکی هم شامل دی.
په ټولنيزو رسنيو کې په خپرو شویو ويډيوګانو کې ښکاري، چې د چاودنې له ځایه د اور لمبې پورته کېدې. دا پېښه د سانتياګو ښار د شمال په رېنکا سيمه کې، د يوې لويې لارې او صنعتي سيمې ته نږدې رامنځته شوې ده.
د اور وژنې د ادارې په وينا، د چاودنې شدت د شاوخوا ۱۵۰ تر ۲۰۰ مترو پورې احساس شوی او لږ تر لږه ۵۰ نورو موټرو ته هم زيان اوښتی دی.
د چيلي ولسمشر ګابريل بوريچ ویلي، چې د چاودنې ځينې توکړې هلته درې سوداګريزو واحدونو ته ورغورځېدلې دي، خو تر اوسه د نورو زيانونو راپور نهدی ورکړل شوی. همدارنګه د سانتياګو والي کلوديو اورېګو ویلي، چې د ټپيانو له ډلې د پنځو کسانو روغتيايي حالت نازک دی او يو تن يې سل په سلو کې سوځېدلی او د مرګ له جدي ګواښ سره مخ دی.
