پاکستاني رسنیو خبر ورکړی، چې د کراچۍ ښار سولایډر بازار سیمه کې د یوه کور دننه د ګاز ډبې چاودنې له امله لږترلږه ۶ کسان مړه او ۱۱ نور ټپیان شوي دي. دغه پېښه د ګل رعنا کالونۍ په سیمه کې شوې ده.
د راپورونو له مخې؛ د پېښې په ځای کې د ژغورنې عملیات پیل شوي او ټپیان د درملنې لپاره نږدې روغتونونو ته لېږدول شوي دي.
د ملګرو ملتونو کارپوهانو په زندانونو کې د ښځو د ساتنې او د هغوی پر وړاندې د جرمونو کمولو لپاره د بېړنیو اقداماتو غوښتنه وکړه. یاد سازمان ویلي، چې اوسمهال په نړۍ کې تر ۷۴۰زره زیاتې ښځې او نجونې په زندانونو کې دي او له ۲۰۰۰کال راهیسې د ښځینه بندیانو شمېر ۶۰ سلنه زیات شوی دی.
د ملګرو ملتونو کارپوهانو د چهارشنبې په ورځ (د سلواغې ۲۹مه) د ښځو د مقام کمېسیون د ۷۰مې غونډې په درشل کې په یوه اعلامیه کې له غړو هېوادونو وغوښتل، چې په جزایي سیسټمونو کې د ښځو او نجونو د ملاتړ پیاوړتیا لپاره عملي ګامونه واخلي.
هغوی خبرداری ورکړی، چې له ازادۍ څخه د بېبرخو ښځو لپاره عدالت، امنیت او انساني کرامت ته لاسرسی خورا لږ دی. د ملګرو ملتونو په وینا؛ دا مهال د نړۍ د زندانیانو له ټول نفوس څخه شاوخوا ۷ سلنه یې ښځې جوړوي.
په اعلامیه کې راغلي، چې د ۲۰۰۰کال راهیسې د ښځینه بندیانو شمېر په چټکۍ سره زیات شوی او د زیاتوالي چټکتیا یې نږدې د نارینهو پرتله درې برابره ده. د دغه شمېرو له مخې؛ شاوخوا ۱۹زره ماشومان هم له خپلو مېندو سره په زندانونو کې ژوند کوي.
د ملګرو ملتونو کارپوهانو ویلي: «ډېری ښځې د بېوزلۍ، جریمې یا ضمانت ورکولو د نشتوالي او د نشهيي توکو اړوندو قضیو له امله بندیانې کېږي». دوی وایي، چې په زندانونو کې ښځې د تاوتریخوالي په ګډون له نورو ګواښونو سره هم مخ دي؛ په ځانګړې توګه جنسي او د جنسیت پر بنسټ تاوتریخوالی، د روغتیایي خدمتونو نشتوالی، ګڼه ګوڼه او نور شرایط چې ښایي د ناوړه چلند یا شکنجې سره برابر وي. هغوی ټینګار وکړ، چې هېوادونه باید په زندانونو او نورو توقیف ځایونو کې د ښځو امنیت تضمین کړي.
د روسیې د بهرنیو چارو وزیر سرګي لاوروف له "العربیه" ټلوېزیون سره په مرکه کې ویلي، چې پر ایران د امریکا او اسراییل هر ډول احتمالي برید به ناوړه پایلې ولري. نوموړي زیاته کړې: «پر اټومي تاسیساتو برید خورا خطرناک دی».
د روسیې د بهرنیو چارو وزیر له العربیه سره په مرکه کې ټینګار وکړ: «پر ایران برید به دغه هېواد اړ کړي چې د اټومي موادو د ساتنې لپاره کوټلي ګامونه پورته کړي».
همدارنګه لاوروف زیاته کړې: «ایران د سولهییزو موخو غني کولو حق لري. تهران چمتو دی چې د غني کولو کچه د سولهییزو موخو لپاره اړینې کچې ته راټیټه کړي».
د روسیې دغه لوړپوړي چارواکي د خپلو خبرو پر دوام زیاته کړې: «زه ډاډه یم چې په ایران کې د اټومي انرژۍ د نړۍوال اژانس ادارې له پلټونکو سره به ایران مرسته وکړي».
رویټرز خبري اژانس د سپینې ماڼۍ د یوه لوړپوړي چارواکي له قوله د ایران د وضعیت په اړه د وروستیو پرمختګونو راپور ورکړی دی.
د رویټرز د راپور لهمخې، تمه کېږي چې د ایران د اسلامي جمهوریت چارواکي له امریکايي مرکچیانو سره د سېشنبې د ورځې له لیدنې را وروسته د هغو موضوعاتو په اړه خپل وړاندیزونه په لیکلي ډول وسپاري، چې ډونالډ ټرمپ پرې ټینګار لري. ویل کېږي، چې د دغو وړاندیزونو موخه د ایران او امریکا ترمنځ له مخامخ ټکر او شخړې څخه مخنیوی دی.
دغه خبري اژانس زیاته کړې، چې د ولسمشر د ملي امنیت د سلاکارانو په غونډه کې چې د چهارشنبې په ورځ د سپینې ماڼۍ د وضعیت په خونه کې جوړه شوې وه، اعلان وشو چې ټول هغه پوځي ځواکونه چې سیمې ته استول شوي دي، باید د مارچ میاشتې تر نیمايي یعنې د کب تر ۲۵مې نېټې پورې په خپلو ټاکل شویو ځایونو کې بشپړ ځای پر ځای شوي وي.
یادې سرچینې رویټرز ته دا هم ویلي، چې د امریکا د بهرنیو چارو وزیر مارکو روبیو به د فبرورۍ په ۲۸مه چې د کب له لسمې نېټې سره برابره ده اسراییل ته سفر وکړي، څو له بنیامین نتنیاهو سره وګوري او د ایران په اړه ورسره خبرې اترې وکړي.
اسراییلي رسنۍ «واینټ» راپور ورکړی، چې ایران پر حزبالله فشار راوړی ترڅو د امریکا د احتمالي برید په صورت کې جګړې ته ورګډ شي.
د یادې رسنۍ د راپور لهمخې، اسراییل «بدلونونه په دقت سره څاري» او «حزبالله ته یې څرګند خبرداری ورکړی چې که د مداخلې پرېکړه وکړي، دا ځل به له خورا دردوونکي ګوزار سره مخ شي».
په یاد راپور کې راغلي، چې د اسراییل پوځ د حزبالله د احتمالي مداخلې لپاره زیان اړونکی پلان چمتو کړی دی.
واینټ لیکلي، چې اسراییل پر ایران د امریکا د برید پرمهال له تهران سره د نورو ډلو سره د احتمالي جګړې لپاره ځان چمتو کوي.
یوه لوړپوړي امریکايي چارواکي والسټریټ ژورنال ته تایید کړې، چې امریکا له سوریې څخه د خپلو ټولو سرتېرو د اېستلو بهیر پیل کړی دی.
والسټریټ ژورنال د یوه لوړپوړي امریکايي چارواکي له قوله ویلي، چې امریکا په سوریه کې مېشت خپل شاوخوا ۱۰۰۰ سرتېرې باسي.
دغه لوړپوړي چارواکي د نوم نه ښودلو په شرط والسټریټ ژورنال ته ویلي: «امریکايي ځواکونه چمتو دي چې په سیمه کې د داعش هر ډول ګواښونو ته ځواب ووايي، په داسې حال کې چې موږ د یادې ترهګري شبکې د بیا راڅرګندېدو د مخنیوي لپاره د خپلو متحدینو د هڅو ملاتړ کوو».
یاد چارواکي ویلي، چې په سوریه کې په لوی شمېر د امریکايي ځواکونو شتون ته نوره اړتیا نشته.
یاد چارواکي زیاته کړې: «د سوریې حکومت لېوالتیا ښودلې، چې په خپلو پولو کې د ترهګریزو ګواښونو پروړاندې د مبارزې اصلي مسوولیت پر غاړه واخلي».
دا په داسې حال کې ده، چې تېره اوونۍ د امریکا پوځ ویلي و چې دوی په سوریه کې له یوې ستراتیژیکې اډې څخه د وتلو لړۍ بشپړه کړې او اډه یې سوریايي ځواکونو ته سپارلې ده.