د پاکستان دفاع وزیر خواجه اصف یو وار بیا ویلي، چې طالبان باید په افغانستان کې مېشت وسلهوال مهار کړي. هغه ویلي، که طالبان د دغه ډلو پر ضد اقدام ونه کړي؛ نو پاکستان به په افغانستان کې له نورو هوايي بریدونو ډډه ونه کړي.
نوموړي له یوې فرانسوۍ رسنۍ سره په مرکه کې ویلي، په پاکستان کې هر برید د طالبانو لهخوا ملاتړ کېږي. خواجه اصف تېر کال په افغانستان کې د پاکستان هوايي بریدونو په اړه د یوې پوښتنې په ځواب کې، او دا چې ایا دغه انتخاب بیا هم شته که نه وویل: «موږ تل دغه انتخاب لرو او کارولی یې شو. دغه انتخاب شته، موږ به ډډه ونه کړو».
هغه زیاته کړه، که په کابل کې څوک د سولې تضمین کولای شي؛ نو دا څرګنده ده چې هیڅ ډول دښمني به پاتې نهشي، «خو دوی د دسیسه جوړونکو ملاتړ او همکارۍ ته دوام ورکړی». د هغه په وینا؛ د ختیځ ترکستان اسلامي غورځنګ، تحریک طالبان پاکستان، داعش او نورې ډلې په افغانستان کې حضور لري او طالبانو ورته خوندي پناهځایونه برابر کړي دي.
د پاکستان دفاع وزیر دا هم ویلي، چې هند له طالبانو او په افغانستان کې له فعاله وسلهوالو ډلو سره «په یوه جبهه» کې ولاړ دی. هغه له یوې جرمنۍ رسنۍ سره هم په مرکه کې ویلي و، چې پاکستان په افغانستان کې د نفوذ ډګر د سیمې نورو هېوادونو ته بایللی دی.
