د کینیا د ملي استخباراتو د خدمتونو یو رپوټ ښيي چې له زرو ډېر کینیايي وګړي د اوکراین پرضد جګړې لپاره د روسي ځواکونو لیکو ته جذب شوي دی. دغو کسانو ته د میاشتې ۲،۷۱۵ ډالره معاش او څه کم ۱۰ زره ډالره اضافي پیسې منل شوې دي.
په نیروبي کې د روسیې سفارت د پنجشنبې په ورځ دا خبره رد کړه چې مسکو دې کینیايان په ناقانونه ډول جذب کړي وي، خو ویې ویل چې بهرني وګړي کولای شي په خپله خوښه د روسیې له وسلهوالو ځواکونو سره یوځای شي.
رپوټ وایي چې جذب کوونکو پخواني سرتېري، پولیس او بېکاره کسان په نښه کړي او ژمنه یې ورسره کړې چې میاشتنی ۳۵۰ زره شیلینګ (۲,۷۱۵ ډالر) معاش او تر ۱،۲ میلیونه شیلینګ (۹,۳۰۹ ډالر) پورې بونس به ترلاسه کړي.
د پارلمان یوه مشر وویل: «تر اوسه له زرو ډېر کینیايان جذب شوي او د روسیې-اوکراین جګړې ته تللي دي».
کینیا په نومبر کې ویلي وو چې له ۲۰۰ څخه ډېر وګړي یې د روسیې په ګټه په اوکراین کې جنګېږي.
په همدې میاشت کې اوکراین اعلان وکړ چې د افریقايي هېوادونو شاوخوا ۱,۴۰۰ تنه اتباع د روسیې ترڅنګ جنګېږي.
د ۲۰۲۶ کال د فبرورۍ تر میاشتې پورې، ۸۹ کینیايان د اوکراین په لومړۍ کرښه کې وو، ۳۹ تنه روغتون کې بستر وو او ۲۸ تنه لادرکه ګڼل شويدي.
رپوټ وایي چې جذب شوي کسان لومړی د سیاحتي ویزو په وسیله له کینیا څخه وتلي او د ترکیې یا متحده عربي اماراتو له لارې روسیې ته رسېدلي دي.
