د افغان کډوالو د نیولو لړۍ پر دوام پاکستاني پولیسو په پنجاب ایالت کې ۲۰ کډوال نیولي دي. د پاکستان پنجاب ايالت اعلان کړی، تر راتلونکې پنجشنبې به دغه ۲۰ افغان وګړي چې د اوسېدو قانوني اسناد نهلري؛ په جبري توګه افغانستان ته ستانه کړي.
دغه اقدام د افغان کډوالو د بېرته ستنولو د هغه پروګرام برخه دی، چې د ۲۰۲۳کال په وروستيو کې پيل شوی دی. د رسمي شمېرو له مخې؛ لاتر اوسه له ټول پاکستان نه څه باندې دوه مېليونه افغان وګړي خپل هېواد ته ستانه شوي، چې يوازې په پنجاب ايالت کې له ۱۵۰زرو ډېر بېاسناده کډوال اېستل شوي.د پنجاب ځایي چارواکو ويلي، ټول هغه افغانان چې د اوسېدو قانوني اسناد نهلري بايد له پاکستان نه واېستل شي؛ خو هغه کسان چې قانوني اسناد لري، کولای شي خپلو دندو او سوداګريزو چارو ته دوام ورکړي. دا مهال په پنجاب کې ۳۷ د ساتنې مرکزونه فعال دي او ۶۹ افغانان پهکې ساتل کېږي، چې له دې ډلې يې ۲۰ تنه بېرته ستنول کېږي.دغه تګلاره د کډوالو په چارو کې د ملګرو ملتونو عالي کمېشنرۍ له نيوکو سره مخ شوې ده. يادې ادارې ويلي، داسې راپورونه يې ترلاسه کړي چې حتا ثبت شوي کډوال هم نيول شوي او په جبري توګه افغانستان ته اېستل شوي دي. دغه ادارې خبرداری ورکړی، چې یاد بهير ښايي د پاکستان له نړۍوالو ژمنو سره په ټکر کې وي.ورته مهال د طالبانو د کډوالو او بېرته راستنېدونکو چارو وزارت ویاند عبدالمطلب حقاني وايي، چې په روان لمریز کال کې ۴مېلیونه ۶۷زره او ۸۰۸ کډوال افغانستان ته ستانه شوي. نوموړي زیاته کړې، چې له ۴۵۵زره ۸۳ کډوالو او بېځایه شویو سره یې د څه باندې ۱۶ مېلیارده افغانیو په ارزښت مرستې کړې دي.
شاوخوا دوه اوونۍ وړاندې د طالبانو د امربالمعروف او نهې عن المنکر وزارت د ټولو ولایتونو د سپورټ او بدني روزنې ولایتي مسوولینو ته د یوه مکتوب په لېږلو سره امر کړی و، چې د «رمضان جام» کرېکټ سیالۍ به نهترسره کوي.
د طالبانو د امربالمعروف او نهې عن المنکر وزارت پر یادو سیالیو د بندیز لامل، د تراوېح لمونځ قضا کېدل بللي وو.
په ورژه کې پر سپورټي سیالیو د طالبانو د بندیز په تړاو د افغانستان انټرنشنل- پښتو د راپور له خپرېدو وروسته، تازه افغانستان انټرنشنل- پښتو په هلمند کې د طالبانو د والي امانالدین منصور هغه مکتوب تر لاسه کړی، چې د شپې لهخوا سپورټي لوبو ته په مشروط ډول اجازه ورکړل شوې ده.
په مکتوب کې لیکل شوي: «د هلمند د ورزشکارانو غوښتنه، وايي زموږ سیالۍ د روژې په خاطر بندې سوي دي، نو د ولایت مقام له طرفه تر تراوېحو وروسته د سیالۍ اجازه سته، تر تراوېحو یو ساعته وروسته».
سرچینو ویلي، چې ورزشي سیالیو ته په دې شرط اجازه ورکړل شوې، چې د طالبانو د امربالمعروف او نهې عن المنکر محتسبین به پر ټولو لوبغالو څارنه کوي او د تراوېح لمونځ پر وخت هغو کسانو ته چې پر لوبو بوخت وي، سزا ورکړل شي.
تر دې مخکې په هلمند کې ګڼو ورزشکارانو او د کرېکټ لوبغاړو د طالبانو لهخوا د شپې له لوري د کرېکټ او نورو ورزشي سیالیو په اړه بندیز ته غبرګونونه ښودلي وو.
دا په داسې حال کې ده، چې هر کال په ولایتونو کې د ټینېس، کرېکټ، فوټسال او فوټبال سیالۍ ترسره کېږي او په یادو سیالیو کې سلګونه لوبغاړي او مینهوال یې ګډون کوي.