د بښنې نړیوال سازمان ټرمپ ته: په امریکا کې د قضایي ځواک خپلواکي باید وساتل شي
د بښنې نړیوال سازمان خبرداری ورکړی، چې د ډونالډ ټرمپ حکومت او د هغه کابینه باید اجازه ونهلري چې د قاضیانو په نیوکو یا نورو لارو د عدالت او د قانون د واک بنسټونه کمزوري کړي. امریکا کې سترې محکمې د ډونالډ ټرمپ تعرفې ناقانونه او لغو اعلان کړي، خو ټرمپ ورسره مخالفت کړی دی.
د یاد سازمان په خبرپاڼه کې ویل شوي، چې د امریکا کانګرس باید ټولې ممکنه هڅې وکړي، څو د قضایي ځواک خپلواکي تأمین کړي، د قاضیانو، وکیلانو او د قضایي ادارو کارکوونکو ملاتړ وکړي او د قضایي ځواک مشروعیت یقیني کړي، چې د اجراییه قوې څارنه وکړي، څو د بشري حقونو سرغړونه او ناعادلانه چلندونه رامنځته نهشي.
د بښنې نړیوال سازمان ټینګار کړی، چې د قضایي ځواک کمزوري کول کولی شي د بشري حقونو د رعایت او د عادلانه محاکمې په برخه کې جدي خطرونه رامنځته کړي. د امریکا سترې محکمې د ډونالډ ټرمپ له لوري لګول شوې ګمرکي تعرفې لغو اعلان کړي او دا کار یې ناقانونه بللی، خو ورسره هممهاله بیا ټرمپ په یو ځانګړي اقدام کې د نړۍ په ټولو هېوادونو د ۱۵۰ورځو لپاره لس سلنه ګمرکي تعرفې وضعه کړې.
د بښنې نړیوال سازمان د ټرمپ دغه اقدام غندلی او ویلي یې دي، چې دا چاره په امریکا کې د محاکمو او قضایي ادارو خپلواکي تر پوښتنې لاندې راولي.
