عباس عراقچي: نه موږ د صفر غنيسازۍ وړاندیز کړی او نه هم امریکا داسې غوښتنه کړې
د ایران د بهرنیو چارو وزیر سید عباس عراقچي ویلي، چې نه تهران د صفر غنيسازۍ وړاندیز کړی او نه هم امریکا له ایران څخه داسې غوښتنه کړې ده.
نوموړي دا څرګندونې له «ایم ایس این بي سي»خبري شبکې سره په مرکه کې کړې دي. عراقچي د دې پوښتنې په ځواب کې، چې ګواکې واشنګټن ایران ته د صفر غنيسازۍ وړاندیز کړی، وویل: «ستاسو اټکل ناسم دی. موږ هېڅ ډول تعلیق نه دی وړاندیز کړی او امریکا هم له موږ څخه د صفر غنيسازۍ غوښتنه نه ده کړې.»
هغه زیاته کړه، چې روانې خبرې اترې پر دې تمرکز لري، څو ډاډ ترلاسه شي چې د ایران اټومي پروګرام سولهییز دی او تل به سولهییز پاتې شي. د ده په وینا، د ایران موخه دا ده چې د خپل اټومي فعالیت سولهییز ماهیت نړیوالې ټولنې ته روښانه کړي.
عراقچي همداراز ټینګار وکړ، چې ایران د امریکا خلک خپل دښمنان نه ګڼي، خو د امریکا د حکومت پالیسۍ د ایران پر وړاندې دښمنانه بولي. هغه وویل: «که دا دښمنانه پالیسۍ پای ته ورسېږي، ښايي دواړه هېوادونه د خپلو اړیکو لپاره نوې او بېله لاره په پام کې ونیسي.»
دا څرګندونې داسې مهال کېږي، چې د ایران د اټومي پروګرام پر سر د تهران او واشنګټن ترمنځ سیاسي او ډیپلوماټیک بحثونه لا هم د نړیوالو پام ځان ته اړولی او دواړه خواوې هڅه کوي د اختلافونو د حل لپاره ډیپلوماټیکې لارې ومومي.
