ډونالډ ټرمپ: پر ایران د برید د ارزونې په حال کې یو
د امریکا ولسمشر ډونالډ ټرمپ، د جمعې په ورځ (کب ۱مه) وویل چې هغه د ایران پر ضد د پوځي برید د ترسره کولو په اړه غور کوي. هغه په دې اړه نور جزییات نه دي ورکړي.
هغه د یوې پوښتنې په ځواب کې چې ایا پر ایران د فشار راوستلو لپاره چې د اټومي پروګرام په اړه هوکړې ته ورسیږي، د برید پلان لري؟، ټرمپ په سپینه ماڼۍ کې خبریالانو ته وویل: «زه فکر کوم او ویلی شم چې زه د دې په اړه غور کوم».
تر دې مخکې، د ایران د بهرنیو چارو وزیر سید عباس عراقچي ویلي، چې نه تهران د صفر غنيسازۍ وړاندیز کړی او نه هم امریکا له ایران څخه داسې غوښتنه کړې ده.
نوموړي دا څرګندونې له «ایم ایس این بي سي»خبري شبکې سره په مرکه کې کړې دي. عراقچي د دې پوښتنې په ځواب کې، چې ګواکې واشنګټن ایران ته د صفر غنيسازۍ وړاندیز کړی، وویل: «ستاسو اټکل ناسم دی. موږ هېڅ ډول تعلیق نه دی وړاندیز کړی او امریکا هم له موږ څخه د صفر غنيسازۍ غوښتنه نه ده کړې.»
هغه زیاته کړه، چې روانې خبرې اترې پر دې تمرکز لري، څو ډاډ ترلاسه شي چې د ایران اټومي پروګرام سولهییز دی او تل به سولهییز پاتې شي. د ده په وینا، د ایران موخه دا ده چې د خپل اټومي فعالیت سولهییز ماهیت نړیوالې ټولنې ته روښانه کړي.
دا څرګندونې داسې مهال کېږي، چې د ایران د اټومي پروګرام پر سر د تهران او واشنګټن ترمنځ سیاسي او ډیپلوماټیک بحثونه لا هم د نړیوالو پام ځان ته اړولی او دواړه خواوې هڅه کوي د اختلافونو د حل لپاره ډیپلوماټیکې لارې ومومي.
