د امریکا د فدرالي تحقیقاتو ادارې اعلان کړی چې دوه ایرانۍ خویندې او د یوې خاوند یې، چې پخوا یې په ګوګل کې کار کاوه، د لټون انجن د تخنیکي معلوماتو او نورو ټکنالوژیو د غلا او ایران ته د دغو معلوماتو د لېږد په تور، د پنجشنبې په ورځ، د سلواغې په ۳۰مه، په امریکا کې نیول شوي دي.
۴۱ کلنه سمانه غندالي او د هغې مېړه ۴۰ کلن محمدجواد خسروي، له خپلې خور ۳۲ کلنې سرور غندالي سره، د پنجشنبې په ورځ ونیول شول. دغو کسانو پخوا په ګوګل کې کار کاوه او د موبایل کمپیوټري پروسسرونو په برخه کې یې فعالیت درلود.
دغه درې کسان تورن دي چې د پروسسر د امنیت، کوډ ګذارۍ او نورو ټکنالوژیو اړوند سوداګریز رازونه یې له ګوګل او نورو ټکنالوژۍ شرکتونو څخه غیرمجازو درېیمو اړخونو او شخصي ځایونو ته، د شرکتونو اړوند کاري وسایلو په ګډون ایران ته لېږدولي دي.
د راپور له مخې، وروسته له هغه چې د ګوګل داخلي امنیتي سیستمونو د سمانه غندالي فعالیتونه وارزول، په ۲۰۲۳ کال کې د هغې لاسرسی یې د شرکت سرچینو ته بند کړ.
د ورته فعالیتونو په بله بېلګه کې، سویډني رسنیو شاوخوا یوه میاشت مخکې د دوو ایرانيتباره وروڼو د نیولو خبر ورکړی و چې د «اسلامي جمهوریت لپاره د صنعتي جاسوسۍ» په شک سویډن کې نیول شوي دي. دا دوسیه د طبي او درملیز ټکنالوژۍ په یوې حساسې کمپنۍ کې د لوړې کچې صنعتي جاسوسۍ پورې اړه لري.
د دوسیې څارنوالې جنا سوراندر ویلي چې دغه شرکت داسې محصولات تولیدوي چې د درملنې له برخې سره تړاو لري.
د هغې په وینا، شرکت د دغو دوو ایرانيتباره وروڼو مشکوک چلند ته پام شو، چې د قضیې مظنونین دي او پولیسو ته یې شکایت وړاندې کړ. هغوی شاوخوا پنځه میاشتې مخکې نیول شوي وو.
سویډني رسنۍ «ټيوي۴ نیوز» راپور ورکړی چې د دې قضیې څېړنې «په کلکه محرمانه» دي او د سویډن د امنیتي خدمت (سپو) په همکارۍ روانې دي.
دغه دوه ایرانيتباره وروڼه څو لسیزې کېږي چې په سویډن کې ژوند کوي او مشر ورور یې د روان میلادي کال له پیل راهیسې د «لوړې کچې جاسوسۍ» په تور تر تعقیب لاندې دی. بل ورور یې هم په همدې قضیه کې د غلا په تور مظنون دی او په دې وروستیو کې په ضمانت له بند څخه خوشې شوی دی.
اسلامي جمهوریت پخوا هم په سویډن کې امنیتي فعالیتونه لرلي دي. د ۱۴۰۱ کال په مني کې، دوه ایراني وروڼه د روسیې لپاره په جاسوسۍ تورن شوي وو.
د سویډن د خپرو شویو راپورونو له مخې، هغه ایراني محصلین او څېړونکي چې له هېواده بهر دي، په یوه داسې پروګرام کې برخه لري چې هدف یې د هغو ټکنالوژیو ترلاسه کول دي چې د اسلامي جمهوریت په پوځي صنعتونو کې کارېدلی شي.
