پاکستان پوځ ته د اصف دراني سپارښتنه؛ په افغانستان کې پر اطلاعاتو ولاړ عملیات پیاوړي کړئ
د افغانستان لپاره د پاکستان پخواني استازی اصف دراني د دغه هېواد پوځ ته په اشارې ویلي، د افغانستان دننه د هوایي بریدونو د ګواښونو پر ځای دې د دقیق استخباراتي معلوماتو پر بنسټ عملیات ترسره شي. هغه ویلي: «ځواک د اندازه شویو اقداماتو له لارې ښودل کیږي، نه د رسنیو د بیاناتو له لارې.»
د افغانستان لپاره د پاکستان پخواني ځانګړي استازی اصف دراني په اېکس کې د افغانستان له خاورې څخه راپورته شویو ګواښونو ته په اشارې سره زیاته کړې چې هیڅ هیواد نشي کولی د دې خطرونو په وړاندې بې پروا پاتې شي.
نوموړي یادونه کړې، چې ملګرو ملتونو لا له وړاندې د وسله والو د «بین السیمه ییز ګواښ» کیدو احتمال په اړه خبرداری ورکړی دی.
هغه ټینګار کړی، چې د هوایي بریدونو ښکاره ګواښ یوازې سیمه ییزه فضا کړکېچنه کوي او د ډیپلوماسۍ ډګر محدودوي.
هغه د دواړو هیوادونو ترمنځ د تړل شویو سوداګریزو لارو د بیا پرانیستلو غوښتنه هم کړې، او ویلي یې دي چې اقتصادي متقابل انحصار کولی شي د پوځي اشارې په پرتله ډیر اغیزمنه ګټه پورته کړي.
تېره ورځ د پاکستان دفاع وزیر خواجه اصف یو وار بیا ویلي و، چې طالبان باید په افغانستان کې مېشت وسلهوال مهار کړي. هغه ویلي، که طالبان د دغه ډلو پر ضد اقدام ونه کړي نو پاکستان به په افغانستان کې له نورو هوايي بریدونو ډډه ونه کړي.
