طالبانو په تېرو څلورو ورځو کې ۱۲ کسان په دُرو وهلي
د طالبانو ستره محکمه وایي، چې د روانې اوونۍ په څلورو ورځو کې یې د افغانستان په بېلابېلو ولایتونو کې پر ۱۲ کسانو د بند تر څنګ په دُرو د وهلو سزاوې عملي کړې دي.
د طالبانو ستره محکمه وایي، چې د روانې اوونۍ په څلورو ورځو کې یې د افغانستان په بېلابېلو ولایتونو کې پر ۱۲ کسانو د بند تر څنګ په دُرو د وهلو سزاوې عملي کړې دي.

د یادې محکمې لهخوا په خپره شوې خبرپاڼه کې راغلي چې دغه سزاوې د شنبې، دوشنبې،چهارشنبې او پنجشنبې په ورځو کې د هېواد په څو ولایتونو کې تطبیق شوې دي.
د خبر پاڼې له مخې د چارشنبې په ورځ کابل کې پنځه کسانو ته، بلخ کې درې کسانو ته، پروان او غور کې دوه- دوه کسانو ته په دُرو وهلو سزا ورکړل شوې ده.
د یادونې وړ ده چې تېره اوونۍ د طالبانو سترې محکمې اعلان کړی و چې د افغانستان په بېلابېلو ولایتونو کې پر ۷۲ کسانو د بند تر څنګ په دُرو د وهلو سزاوې عملي کړې دي.

په انقره کې د طالبانو سفارت وایي، چې طالب سفیر سنیع الله فرهمند ددې هېواد لپاره د قزاقستان له سفیر، ساپیوف یرکیبولان اونالبیکولي، سره کتلي او د دوه اړخیزو سیاسي او اقتصادي اړیکو پر پیاوړتیا غږېدلي دي.
له یاد سفارت څخه په خپره شوې خبرپاڼه کې راغلي، چې په دې کتنه کې دواړو لوریو د افغانستان او قزاقستان ترمنځ د کلتوري اړیکو پر پیاوړتیا هم هر اړخیزې خبرې کړې دي. د دواړو لوریو استازو ټینګار کړی، چې د اقتصادي همکاریو پراختیا، پانګونه او سوداګریز تعامل کولی شي د سیمې د ثبات او پرمختګ لپاره مهم رول ولوبوي.
ویل کېږي چې د لیدنې پر مهال د سوداګرۍ د کچې د لوړولو، د پانګونې فرصتونو، ترانزیټي همکاریو او د سیمهییزو پروژو د پراختیا موضوعات هم مطرح شوي دي.
خبرپاڼه زیاتوي، دواړو لوریو ژمنه کړې، چې د سوداګریزو پلاوو تبادله، د نندارتونونو جوړول او د ګډو اقتصادي کمېټو فعالول به د اړیکو د لا پیاوړتیا لپاره مهم ګامونه وي.
همداراز قزاق سفیر د سیمهییزو همکاریو، ترانزیټي دهلیزونو او د منځنۍ اسیا له هېوادونو سره د افغانستان د نښلولو پر ارزښت ټینګار کړی دی.
د یادولو وړ ده، چې قزاقستان په دې وروستیو کې له طالبانو سره د سوداګرۍ او بشري مرستو په برخه کې همکاري زیاته کړې او هڅه کوي، چې د منځنۍ اسیا او جنوبي اسیا ترمنځ د اقتصادي اړیکو په پراختیا کې رغنده رول ولوبوي.
په پکتیا کې د طالبانو د کرنې، اوبو لګولو او مالدارۍ ریاست د مېوو برخې مسوول سنګرمل جلالي وایي، په دغه ولایت کې سږکال د بېلابېلو مېوو شاوخوا شپږ نیم زره مټریک ټنه حلاصلات راټول شوي چې د تېر کال پرتله ۱۵ سلنه زیاتوالی ښیي.
د هغه په وینا؛ دغه ولایت ۳۷۹ سړې خونې لرې او د مېوو په برخه کې ځان بساینې ته نږدې دی. سنګرمل جلالي وايي، چې په پکتیا کې سږ کال د مېوو او سبزیجاتو په تولیداتو کې د تېرکال پرتله د پام وړ زیاتوالی راغلی.
نوموړي زیاته کړې، چې دغه ولایت د سړوخونو په لرلو د مېوې او سبزیجاتو په برخه کې پرځان بسیا شوی او دامهال یوازې په یوه سړه خونه کې شاوخوا ۷۰۰ ټنه مڼې ساتل کېږي.
هغه ویلي: «خوشبختانه موږ پکتیا کې دومره سړې خونې لرو او هیڅ اړتیا نهشته، چې په بېړني ډول یې نورو هېوادونو ته ولېږو. اوس یې دلته ساتلای و. یوازې په یوه سړه خونه کې تقریبا ۷سوه ټنه مڼې موجودې دی».
جلالي دا هم ویلي، چې د کرنیزو محصولاتو د ساتنې او بازار موندنې په موخه یې د سړوخونو جوړولو ته پاملرنه کړې او سږ کال په دغه ولایت کې ۶۱ د سبزیجاتو او مېوو سړې خونې لري. نوموړی وايي: «موږ پکتیا کې ۳۷۹ سړې خونې جوړې کړې. سږ کال ۶۱ د سبزیجاتو او مېوه جاتو سړې خونې لرو په هر موسم کې چې دوی وغواړي موږ مېوه ورته لېږلای شو».
خو د طالبانو د کرنې، اوبو لګولو او مالدارۍ وزارت د تولیداتو خونه وایي، چې روان لمریز کال کې په افغانستان کې ۱۵۰ معیاري سړې خونې جوړې شوې دي. د یاد وزارت په وینا؛ دغه سړې خونې له ۲۰ څخه تر ۵زره ټنو پورې د ساتنې ظرفیت لري.
د سړو خونو په اړه دغه څرګندونې په داسې حال کې دي، چې افغان بزګران او بڼوال بیا شکایت کوي چې د سړو خونو د نشتوالي له کبله یې توکي په کمه بیه پلورل کېږي. ځینې بزګرانو او بڼوالو له افغانستان انټرنشل-پښتو سره په خبرو کې ویلي، مجبور دي چې خپل کرنیز توکي په نشت بیه وپلوري ځکه چې د ساتنې لپاره امکانات نهلري.
د طالبانو د روغتیا وزارت ویاند شرافت زمان امرخېل وایي، چې په تېر ۲۰۲۵کال کې په افغانستان کې په خوارځواکۍ د اخته درې مېلیونه ماشومانو درملنه شوې ده. د هغه په وینا؛ د ۲۰۲۵کال په پیل کې ځینو بنسټونو په افغانستان کې په خوارځواکۍ د اخته مېندو او ماشومانو شمېر ۳.۷ مېلیونه ښودلی و.
نوموړي زیاته کړې، چې د دغه کسانو درملنه د افغانستان په شاوخوا ۳زره او ۲۰۰ مرکزونو کې شوې ده. هغه وایي، په یاده موده کې له دې ډلې ورسره په سختې خوارځواکۍ اخته ۷۰۰زره ناروغان ثبت شوي دي.
له بل پلوه د ملګرو ملتونو د خوړو نړۍوال پروګرام مشر جان ایلیف په افغانستان کې د خوارځواکۍ ناورین په اړه خبرداری ورکړی. هغه د مرستو د کمښت ویجاړونکو پایلو ته په اشارې ویلي:« د څلور مېلیونه ماشومانو ژوند له ګواښ سره مخ دی».
جان ایلیف اسوشیټېډ پرېس ته وویل: «موږ اوس اړ یو، چې د هرو څلورو کسانو له ډلې یوازې له یوه سره مرسته وکړو؛ ځکه چې کافي بودجه نهلرو». هغه زیاته کړه: «دغه شمېرې بېسارې دي او ما د بشري فعال په توګه د خپلې ۳۰کلنې کاري تجربې پرمهال هیڅکله داسې څه نهو لیدلي».
د پاکستان حکومت په روژې میاشت کې هم د افغان کډوالو پر وړاندې د نیولو له عملیاتو خبر ورکړی. دغه ګډ عملیات د پاکستان د پولیسو او ترهګرۍ ضد ادارې لهخوا په پنجاب ایالت کې پیل شوي دي.
دغه عملیات چې تازه د اسلاماباد په ترنول او نورو سیمو کې پیل شوي، تر دې دمه پهکې ۵۱ افغان کډوال نیول شوي دي. پاکستانۍ رسنۍ اېکسپرېس ټربیون راپور ورکړی، ټاکل شوې چې له ۲زره زیات امنیتي پرسونل په اسلاماباد او نورو ښارونو کې د بېاسناده افغان کډوالو په وړاندې عملیات ترسره کړي.
یادې رسنۍ د پاکستاني چارواکو په حواله لیکلي، چې د لټون دغه عملیات یې په اسلاماباد، راولپنډۍ، اټک، جهلم او چکوال کې پیل کړي دي. په خبر کې ویل شوي، چې د اسلاماباد په ترنول، اتحاد کالونۍ او شاخوا سیمو کې په ګډو عملیاتو کې ۱۶۵ کورونه تالاشي شوي او له ۵۷۰ کسانو یې پوښتنې او څېړنې کړې دي.
له بل پلوه د طالبانو د کډوالو او بېرته راستنېدونکو چارو وزارت ویاند عبدالمطلب حقاني وايي، چې په روان لمریز کال کې ۴مېلیونه ۶۷زره او ۸۰۸ کډوال افغانستان ته ستانه شوي. نوموړي زیاته کړې، چې له ۴۵۵زره ۸۳ کډوالو او بېځایه شویو سره یې د څه باندې ۱۶ مېلیارده افغانیو په ارزښت مرستې کړې دي.
په خوست کې د طالبانو د والي ویاند مستغفر ګربز وايي، په دغه ولایت کې د یادې ډلې د نرخونو د کنټرول او احتکار مخنیوي کمېسیون له لوري د ښار په بېلابېلو سیمو کې د «بېل د نشتوالي» له امله د خوراکي توکو ۱۲ هټۍ تړل شوې دي. د هغه په وینا؛ دغه هټۍ به د دوی تر دویم امر پورې تړلې وي.
ښاغلي ګربز ویلي، چې د دغه ولایت د بیو د کنټرول او د احتکار مخنیوي کمېسیون د ښار په بېلابېلو برخو کې د هټیو د توکو د بیو روڼتیا، د وزن اصلاح او د بېلونو د کڼټرول په موخه څار پیل کړی.
نوموړي زياته کړې: «هغه ۱۲ د خوراکي توکو دوکانونه چې پېرېدونکو ته یې توکي په لوړو بیو پلورل او هم یې د پلور رسمي بېلونه نه درلودل د یاد کمېسیون له لوري تر بل امر پورې وتړل شول».
ورته مهال طالبانو په خوست کې له ټولو هټۍوالو غوښتنه کړې، چې د ټاکل شویو بیو او معیاري وزنونو سره سم پېر او پلور وکړي. د روژې د رارسېدو سره سم په کابل او ولایتونو کې ګڼ شمېر افغانان د خوراکي توکو د بیو د پام وړ لوړوالي له امله سر ټکوي؛ خو طالبانو بیا د بیو د لوړېدو د مخنيوي ډاډ ښودلی دی.