د افغانستان کرېکټ بورډ اعلان کړی چې د کرېکټ ملي لوبډلې او الف لوبډلې یو شمېر لوبغاړي د سریلانکا پر وړاندې د راتلونکې شل اوریزې او پنځوس اوریزې لوبلړۍ لپاره په خوست کې تمرینات پیل کړي دي.
د یادې ادارې په وینا، د تمریناتو کمپ د فبروري په ۶مه نېټه په رحمتولي مسرور کرکټ لوبغالي او اکاډمۍ کې پیل شوی او تر فبروري ۲۶مې نېټې پورې به دوام وکړي.
کرېکټ بوډ زیاته کړې، په دې کمپ کې د ملي لوبډلې ۱۸ لوبغاړي ګډون لري او تمرینونه د لوبډلې د بشپړ چمتووالي لپاره په منظمه توګه روان دي.
افغان کرکټ بورډ همدارنګه ویلي چې د مارچ میاشتې په دویمه لسیزه کې به په متحده عربي اماراتو کې د سریلانکا کوربهتوب لاندې رسمي لوبلړۍ ترسره شي، او د لوبو رسمي نېټې او لوبغالي به ډېر ژر اعلان شي.
د تخار ولایت د ورزش برخې چارواکو لهخوا د ورزشي فعالیتونو د ځنډولو په اړه د رسمي مکتوب او فرمان له خپرېدو وروسته، اوس په کندوز او هرات ولایتونو کې هم د سیالیو او ورزشي فعالیتونو د ځنډولو رسمي مکتوبونه خپاره شوي دي.
په دغه ولایتونو کې هم چارواکو د یوې میاشتې لپاره د ورزشي فعالیتونه د ځنډولو امر کړی دی. هغه لیک چې د کندوز ولایت د المپیک، بدني روزنې او سپورت ریاست لهخوا خپور شوی پهکې راغلي، چې د افغانستان د المپیک، بدني روزنې او سپورت ریاست د دعوت او ارشاد ریاست د عمومي اجرایوي مدیریت او د امر بالمعروف د قانون پلي کولو پلاوي د لارښوونې پربنسټ ټولو فدراسیونونو، کلبونو او ورزشي لوبغالو ته خبر ورکول کېږي چې د روژې تر پایه پورې د هر ډول سیالیو د ترسره کېدو مخه ونیسي.
دارنګه د هرات ولایت د المپیک او بدني روزنې ریاست لهخوا په یوه رسمي اعلامیه کې په ټولو ولسوالیو کې سپورتي فدراسیونونو، کلبونو او لوبغاړو ته لارښوونه شوې چې د لمانځه پرمهال خپل تمرینونه ودروي.
د دغه اعلامیې په یوه بله برخه کې ټینګار شوی، چې د روژې مبارکې میاشتې په درناوي د فدراسیون ټولې سیالۍ او ورزشي لوبغالي به د یادې میاشتې تر پایه وتړل شي. لاتر اوسه د درېیو ولایتونو مکتوبونه خپاره شوي او داسې ښکاري، چې دغه حکم په عمومي ډول د هېواد ټولو ولایتونو ته لېږل شوی دی.
د طالبانو لهخوا په ولایتونو کې د روژې په میاشت کې د «رمضان» جام کرېکټ سیالیو بندیز په اړه د افغانستان انټرنشنل- پښتو له راپور وروسته، دغې ډلې په هلمند کې په مشروط ډول د شپې لهخوا سپورټي لوبو ته اجازه ورکړه.
شاوخوا دوه اوونۍ وړاندې د طالبانو د امربالمعروف او نهې عن المنکر وزارت د ټولو ولایتونو د سپورټ او بدني روزنې ولایتي مسوولینو ته د یوه مکتوب په لېږلو سره امر کړی و، چې د «رمضان جام» کرېکټ سیالۍ به نهترسره کوي.
د طالبانو د امربالمعروف او نهې عن المنکر وزارت پر یادو سیالیو د بندیز لامل، د تراوېح لمونځ قضا کېدل بللي وو.
په ورژه کې پر سپورټي سیالیو د طالبانو د بندیز په تړاو د افغانستان انټرنشنل- پښتو د راپور له خپرېدو وروسته، تازه افغانستان انټرنشنل- پښتو په هلمند کې د طالبانو د والي امانالدین منصور هغه مکتوب تر لاسه کړی، چې د شپې لهخوا سپورټي لوبو ته په مشروط ډول اجازه ورکړل شوې ده.
په مکتوب کې لیکل شوي: «د هلمند د ورزشکارانو غوښتنه، وايي زموږ سیالۍ د روژې په خاطر بندې سوي دي، نو د ولایت مقام له طرفه تر تراوېحو وروسته د سیالۍ اجازه سته، تر تراوېحو یو ساعته وروسته».
سرچینو ویلي، چې ورزشي سیالیو ته په دې شرط اجازه ورکړل شوې، چې د طالبانو د امربالمعروف او نهې عن المنکر محتسبین به پر ټولو لوبغالو څارنه کوي او د تراوېح لمونځ پر وخت هغو کسانو ته چې پر لوبو بوخت وي، سزا ورکړل شي.
تر دې مخکې په هلمند کې ګڼو ورزشکارانو او د کرېکټ لوبغاړو د طالبانو لهخوا د شپې له لوري د کرېکټ او نورو ورزشي سیالیو په اړه بندیز ته غبرګونونه ښودلي وو.
دا په داسې حال کې ده، چې هر کال په ولایتونو کې د ټینېس، کرېکټ، فوټسال او فوټبال سیالۍ ترسره کېږي او په یادو سیالیو کې سلګونه لوبغاړي او مینهوال یې ګډون کوي.
جانټن ټراټ د ۲۰۲۲ کال په جولای کې د افغان لوبډلې د مشر روزونکي په توګه دنده پیل کړه او تر پخوانیو روزونکو یې ځان په خپله دنده کې بریالی ثابت کړ او د نوموړي تر روزنې لاندې افغان لوبډلې د نړۍ سترو لوبډلو ته ماتې ورکړې.
جانټن ټراټ د ۲۰۲۲ کال په جولای میاشت کې د افغانستان له کرېکټ بورډ سره د افغان کرېکټ ملي لوبډلې د مشر روزونکي په توګه دنده پیل کړه.
د نوموړي په روزنه کې افغان لوبډله په ۲۰۲۳ کال پنځوس اوریز نړۍوال جام کې تر بل هر وخت ډېره وځلېدله.
د ۲۰۲۳ کال پنځوس اوریز کرېکټ نړۍوال جام کې افغان لوبډلې د ټراټ تر مشرۍ لاندې په لومړي ځل د انګلستان او پاکستان ملي لوبډلو ته ماتې ورکړه او په لومړي ځل یې د یوه نړۍوال جام په جدول کې شپږم ځای خپل کړ.
همدارنګه افغان لوبډله د جانټن ټراټ تر مشرۍ لاندې په ۲۰۲۴ کال کې د شل اوریز نړۍوال جام تر نیمه پایلوبې ورسېده، دا نو لومړۍ ځل و، چې افغان لوبډله په نړۍوال جام کې دومره ستر پرمختګ کوي.
افغان لوبډلې د یاد نړۍوال جام د سیالیو پر مهال په لومړي ځل د نړۍ سترو لوبډلو استرالیا او نیوزیلنډ ته په ماتې ورکولو سره نړۍ حیرانه کړه او داسې انګېرل کېده، چې افغان لوبډله به د نړۍوال جام پایلوبې ته لاره ومومي، خو په هغه نړۍوال جام کې له افغان لوبډلې سره بخت یاري ونهکړه او په نیمه پایلوبه کې له ماتې سره مخ شوه.
خو د جانټن ټراټ تر روزنې لاندې د افغان لوبډلې د پرمختګ له امله دغه انګلستاني روزونکي د میلیونونو افغان کرېکټ مینهوالو پام ځان ته واړوه او ځان یې د ټولو د خوښې روزونکي په توګه بریالی ثابت کړ.
افغان لوبډلې د ټراټ تر مشرۍ لاندې د ۲۰۲۴ کال په نړۍوال جام کې له بریالي سفر وروسته په لومړي ځل له سویلي افریقا څخه د یو ورځینو لوبو لړۍ وګټله او دا بریا نو د افغان کرېکټ په تاریخ کې د یوه زرین باب په توګه ثبت شوه، ځکه افغان لوبډلې تر دې وړاندې له داسې پیاوړې لوبډلې څخه د لوبو لړۍ نهوه ګټلې.
د راپورونو لهمخې، افغان لوبډلې د جانټن ټراټ تر روزنې لاندې ۴۸ شل اوریزې لوبې ترسره کړي، چې له دې ډلې یې ۲۸ یې ګټلي، ۱۸ یې بایللې او دوه یې هم مساوي کړي او په شل اوریزو لوبو کې د افغان لوبډلې بریا ۵۸ سلنه وه.
همدارنګه د نوموړي تر روزنې لاندې افغان لوبډلې ۴۲ یو ورځنۍ لوبې تر سره کړي، چې له دې ډلې یې ۱۸ ګټلي، ۲۲ یې بایللي او ۲ یې مساوي کړې دي. د ټراټ په مشرۍ افغان لوبډلې پنځه ټیسټ لوبې ترسره کړي، چې له دې ډلې یې یوه ګټلې او ۴ یې بایللې دي.
د جانټن ټراټ روزنه تر ډېره د افغان لوبډلې لپاره ښه تمامه شوې او د افغان لوبډلې تکره پیلیز توپ وهونکي ابراهیم ځدراڼ او رحمانالله ګربز هم د نوموړي د روزنې پایله ده، چې دواړه په ډېره کمه موده کې د نړۍ په کچه بریالي لوبغاړي ثابت شوي دي.
دا په داسې حال کې ده، چې ابراهیم ځدراڼ نن په ۲۰۲۶ نړۍوال جام کې د کاناډا پر وړاندې د افغانستان په وروستۍ لوبه کې ۹۵ ناسوځیدلې منډې جوړې کړې او د لوبې د غوره لوبغاړي جایزه یې هم وګټله، خو نوموړي خپله دغه جایزه د لوبډلې روزونکي جانټن ټراټ ته ډالۍ کړه.
جانټن ټراټ په روان نړۍوال جام کې د افغانستان د سفر د پای او خپلې کاري مودې د ختمېدو پر مهال یوه خبر کنفرانس راڅرګند شو او له لوبډلې سره د خدای پامانۍ پر مهال خفه ښکارېده.
نوموړي له افغان لوبډلې سره د یوځای کېدو او د لوبډلې د پرمختګونه په اړه ویلي: «ما افغان لوبغاړي په لومړي ځل په اېرلنډ کې ولېدل، دوی ډېر ځیرک، خواریکښ او مسلکي لوبغاړي و، زه په یاده لرم، چې په لومړۍ ورځ مې رحمانالله ګربز، راشد خان، مجیبالرحمن او نور لوبغاړي ولېدل، دوی خورا ښه استعدادونه لري. دوی خام استعدادونه و، ومې غوښتل له دوی سره کار وکړم او زما کار ښه پایله ولري نن دوی ښه لوبیږي. دوی اوس د لویو لوبډلو د ماتولو وړتیا لري او خلک تمه لري، چې موږ په هر جام کې تر نیمه پایلوبې ورسېږو».
د افغانستان کرېکټ بورډ هم د یوې خبرپاڼې په خپرولو سره د جانټن ټراټ د خدمتونو، د افغان لوبډلې او افغان کرېکټ پرمختګ ته د ژمنتیا، نه ستړې کېدونکو هلو ځلو او مسلکي چلند ستاینه کړې او ویلي یې دي، چې د نوموړي تر روزنې لاندې افغان لوبډلې سترې او تاریخي بریاوې ترلاسه کړې دي.
افغان اتلانو د ۲۰۲۶ کال د شل اوریز نړۍوال جام په ګروپي سیالیو کې له کاناډا څخه د ۸۲ منډو په توپیر لوبه وګټله او ورسره یې په روان نړۍوال جام کې سفر هم پای ته ورسېد.
د افغانستان د کرېکټ ملي لوبډلې نن (پنجشنبه د سلواغې ۳۰مه) د نړۍوال جام په ګروپي سیالیو کې د کاناډا پر وړاندې غوره لوبه نندارې ته وړاندې کړه.
د ننۍ لوبې پچه کاناډا وګټله او د افغان لوبډلې پر وړاندې یې د توپ اچونې پرېکړه وکړه.
افغان لوبډلې د ابراهیم ځدراڼ د ۹۵ منډو په مرسته د کاناډا لوبډلې ته په شلو اورونو کې د ۲۰۱ منډو هدف ورکړ.
د لوبې په دویمه برخه کې بیا محمد نبي غوره توپ اچوونه نندارې ته وړاندې کړه او په څلورو اورونو کې یې د کاناډا څلور لوبغاړي د سیالۍ له ډګره بهر کړل.
د افغان لوبډلې د غوره توپ اچونې په مقابل کې د کاناډا لوبډلې په شلو اورونو کې د اتو لوبغاړو په زیان سره یوازې ۱۱۸ منډې جوړې کړې او بالاخره لوبه د ۸۲ منډو په توپير د افغان لوبډلې په ګټه پایته ورسېده.
دا د ۲۰۲۶ کال په شل اوریز نړۍوال جام کې د افغان لوبډلې وروستۍ لوبه وه.
افغان لوبډلې په روان نړۍوال جام کې څلور لوبې ترسره کړې، چې دوه لوبې یې سویلي افریقا او نیوزلینډ ته وبایللې او دوه لوبې یې بیا له کاناډا او متحده عربي امارات څخه وګټلې.
د ۲۰۲۶کال نړۍوال جام سیالیو پر دوام د افغانستان کرېکټ ملي لوبډله په خپلې څلورمې او وروستۍ لوبه کې نن د کاناډا پر وړاندې د لوبو ډګر ته ښکته کېږي. افغان لوبډله په دغه سیالیو کې د لږو امتیازونو په لرلو سره په نړۍوال جام کې خپل سفر پای ته رسوي.
د افغانستان او کاناډا کرېکټ ملي لوبډلو ترمنځ دغه لوبه نن پنجشنبه د کابل په وخت د ماښام په ۶بجو د هند په چنای لوبغالي کې پیلېږي. تېره ورځ د کاناډا پر وړاندې د نیوزېلنډ د کرېکټ ملي لوبډلې په بریا سره د افغانستان د کرېکټ ملي لوبډله د شلاوریز نړۍوال جام له سیالیو بهر شوه.
نیوزیلنډ د دغه سیالیو د څلورم ګروپ په خپلې وروستۍ لوبه کې کاناډا ته د ۸ وېکټو په توپیر ماتې ورکړه. د شل اوریز نړۍوال جام سیالیو له څلورمې ډلې څخه سویلي افریقا د ۴ بریاوو او ۸ امتیازونو په ترلاسه کولو د خپل ګروپ لومړی او نیوزېلنډ لوبډلې د درېیو بریاوو او ۶ امتیازونو په ترلاسه کولو د خپلې ډلې دویم ځای خپل کړی.
له دغه جدول څخه سویلي افریقا او نیوزېلنډ لوبډلو د ۸ غوره لوبډلو پړاو ته لاره موندلې، افغانستان، متحده عربي امارات او کاناډا لوبډلې د مخ ته تګ څخه پاتې شوې.