سیمهييزو سرچینو افغانستان انټرنشنل ـ پښتو ته ویلي، چې پاکستاني ځواکونو د پکتیکا له برمل ولسوالۍ وروسته د ننګرهار پر خوګياڼو ولسوالۍ هم هوايي بریدونه کړي دي. طالبانو تر اوسه د یادو بریدونو په اړه څه نه دي ویلي.
د لومړنیو معلوماتو لهمخې، په دې بریدونو کې مدرسې او د طالبانو امنیتي پوستې په نښه شوې دي.
طالبانو د هلمند په باغران او د ننګرهار په خوګياڼو ولسوالیو کې د نشهيي توکو د پروسس ۱۱ کارخونې کشف او لهمنځه وړې دي.
په هلمند کې د طالبانو د والي دفتر د شنبې په ورځ (د کب ۲مه) د یوې خبرپاڼې په خپرولو سره ویلي، چې د دې ولایت په باغران ولسوالۍ کې یې د نشهيي توکو د پروسس یاد شمېر کارخونې کشف کړې دي.
په خبرپاڼه کې راغلي، چې طالبانو په یادو کارخونو کې ۲۸۶۶ کیلو اومان، ۷۲۰ لیټره اېکسل مواد، ۸۰ لیټره تېزاب، ۱۳۰۵ کیلو سود مواد، ۲۸۰ لیټره ډیزل، ۱۲۰ کېلو مالګه، څلور ژرندې او نور مواد هم تر کشف وروسته له منځه وړي دي.
طالبانو دا نه ده څرګنده کړي چې د نشهيي توکو د کارخونو په تړاو یې څوک نیولي او که نه.
پر همدغه مهال ختیځ کې د طالبانو د خالد بن ولید ۲۰۱ قول اردو په یوې خبرپاڼه کې ویلي، چې د ننګرهار ولایت په خوګياڼو ولسوالۍ کې یې د نشهيي توکو د پروسس یوه کارخونه کشف کړې ده.
طالبانو ویلي، چې په یاده کارخونه کې یې ۵۲ کیلو شیشه، د اپینو خټه، چونه، نوشادر، ګچ، دوه شاجورونه او ۳۰ فیره مرمۍ هم نیولي دي.
طالبانو ویلي، چې د نشهيي توکو د پروسس کارخونې په تړاو یې څلور کسان هم نیولي دي.
د طالبانو د چارو ادارې ریاست وايي، د کونړ په مرکز او ولسوالیو کې یې د ملا هبتالله د۱۷مې او ۲۰مې ګڼې فرمانونو مهم پیغامونه په بېلبورډونو کې نصب کړل. دغه ریاست یاد فرمانونه د ټولنې د «سمون او پرمختګ» لامل ګڼي او وايي، تر دې وروسته به دا لړۍ لغمان او نورستان ولایتونو ته هم وغځېږي.
د طالبانو د چارو ادارې لوی ریاست د شنبې په ورځ (د کب ۲مه) د یوې خبرپاڼې په خپرولو سره ویلي، له دغې چارې یې موخه دا ده، چې ولس په اسانه توګه خبر او پر «ارزښتونو» یې پوه شي.
دغه ریاست دغه چاره د ټولنې د «اصلاح»، د ناسمو دودونو د مخنیوي او د ښاري نظم د پیاوړتیا لپاره مهم بولي او له خلکو غواړي چې په خپل ورځني ژوند کې یې رعایت کړي.
د ملا هبتالله اخوندزاده ۱۷مه ګڼه فرمان د خېښیو، ودونو، مصیبتونو او حج او عمرې څخه د راستنېدو پر مهال د ناوړه دودونو او غېر ضروري لګښتونو د مخنیوي او ۲۰مه ګڼه فرمان د ښاري طرحو، نقشو، ښاري پلانونو او ودانیزو چارو د تنظیم په په تړاو صادر شوي دي.
ډېری افغانان په نیوکو سره وايي، د طالبانو دغه ډول فرمانونه یوازې پر عامو خلکو تطبیق کېږي او پر طالبانو او اړوندو کسانو یې نهعملي کېږي.
په دغو بنرونو کې د طالبانو د مشر ملا هبتالله د یوه فرمان «واده او په اړوندو چارو کې د رعایت وړ ټکي» لیکل شوي، «په زور، ګواښ او ډزو سره نکاح نهکېږي، بلکې دا جرم دی او مجرم محاکمو ته معرفي کېږي».
په دغو یوه لګول شوي بېلبورډ کې لیکل شوي: «د واده زلمی به د واده مراسم امارتي موټر کې نهترسره کوي». حال دا چې په ډېریو ودونو کې له دولتي موټرو استفاده کېږي او ځينې داسې ویډیوګانې هم په ټولنیزو رسنیو کې خپرې شوې، چې طالبان په دولتي موټرونو کې د خپلو کورنیو لپاره خوراکي مواد هم لېږدوي.
د طالبانو د چارو ادارې ریاست یاد فرمانونه د «ټولنې د سمون او پرمختګ» لامل ګڼي.
د طالبانو د امربالمعروف وزارت وايي، په تېره یوه میاشت کې یې د ښځو د حقونو اړوند ۳۶۸ قضیو ته رسېدګي کړې ده. دغه وزارت زیاتوي، چې په یاده موده کې یې د ۵۳ اجباري نکاحګانو مخه هم نیولې ده.
د طالبانو د امربالمعروف وزارت ویاند سیفالاسلام خېبر د دغې ډلې تر واک لاندې ملي ټلوېزیون ته ویلي، چې په سلواغې میاشت کې د ښځو د حقونو ۳۶۸ قضیو ته رسېدنه شوې ده.
سیفالاسلام خېبر زیاته کړې: «په تېره میاشت کې د ښځو د حقونو اړوند ۳۶۸ قضیو ته رسېدنه شوې ده. همدارنګه د کورني تاوتریخوالي د ۱۳۹ پېښو مخنیوی هم شوی دی».
خو په ورته مهال بیا د ښځو د حقونو د دفاع او د بشري حقونو نړۍوالې ادارې وايي، چې طالبانو پهخپله د میلیونونو افغان نجونو حقونه تر پښو لاندې کړي.
پر افغانستان د طالبانو له واکمنېدو وروسته، دغې ډلې پر نجونو او ښځو د زدهکړو د بندیز ترڅنګ له کور څخه بهر پر کار، سفر او د ژوند په ګڼو نورو برخو کې هم سخت بندیزونه لګولي دي.
پر همدغه مهال د طالبانو د امربالمعروف وزارت ویاند زیاته کړې، چې تېره میاشت یې د افغانستان په بېلابېلو ولایتونو کې د اجباري نکاحګانو مخنیوی هم کړی دی.
طالبان پر داسې مهال په تېره یوه میاشت کې د جبري نکاحګانو د مخنیوي خبر ورکړی، چې د یادې ډلې پر غړو تور دی، چې ښځې د هغوی له خوښې پرته ځانونو ته په نکاح کوي.
ایراني رسنیو راپور ورکړی چې د دوغارون په سرحدي بندر کې د تګ راتګ بهیر د ښه کېدو لپاره له ځینو اقداماتو سره لا هم د باروړونکو موټرو ګڼهګوڼه دوام لري. دوی زیاتوي، چې د افغانستان په لوري کې ستونزې لا هم پر خپل ځای پاتې دي او زرګونه موټر د اسلام کلا په ګمرک کې بند دي.
د ایراني رسنې «شهرارا نیوز» د راپور له مخې، د ایران او افغانستان د سوداګرۍ ګډې خونې ویلي چې د اجرایوي بنسټونو ترمنځ د همغږۍ او له اسلامقلعه څخه دوغارون ته د بېرته ستنېدو د نوې لارې په جوړېدو سره، د دوغارون په سرحدي پایانه کې د باروړونکو موټرو د تم کېدو موده له دوو تر درېیو شپو پورې راکمه شوې ده.
خو راپور زیاتوي چې تر اوسه له زرو ډېر ایراني باروړونکي موټر د اسلامقلعه په ګمرک کې ولاړ دي او چلوونکي یې څو شپې د افغانستان خاورې ته د ننوتلو په تمه پاتې کېږي.
د ګډې سوداګرۍ خونې په وینا، د ترافیکي ستونزې اصلي غوټه اوس د افغانستان په لوري کې ده. ویل شوي چې دا موضوع د ایران د بهرنیو چارو وزارت له لوري څارل کېږي او د طالبان د هرات له ځايي مسوولانو غوښتنه شوې چې د منلو ظرفیت لوړ او د تګ راتګ بهیر چټک کړي.
دوغارون د ایران او افغانستان ترمنځ له مهمو سوداګریزو بندرونو څخه شمېرل کېږي او هر ډول ځنډ یا خنډ کولای شي د دواړو هېوادونو ترمنځ د صادراتو او ترانزیټ پر بهیر مستقیم اغېز وکړي.
د طالبانو د کورنیو چارو وزارت وايي، چې د دوی ځواکونو د ډیورنډ پر کرښه په طورخم کې له پاکستان څخه را لېږدول کېدونکې ۵۲۵ میل بېلابېلې وسلې او مهمات کشف او ضبط کړي دي. دوی زیاتوی دا وسلې له پاکستان څخه د راوښتو افغان کډوالو د کډو په دوو موټرو کې نیول شوي دي.
د طالبانو د کورنیو چارو وزارت یوه چارواکي پر اېکس خواله رسنۍ کې لیکلي، چې په نیول شویو وسلو او مهماتو کې ۲۷ زره فیره مرمۍ، ۲۰۰ بنډله پرمیکاټ، لس میله امفور ټوپکونه، لس لېزرونه، لس دوربینونه، ۱۷ میله ټيټيکوف، یو میل کلاشینکوف او ۴۹۷ میله بېلابېل ډوله توفنګچې شاملې دي.
د یادو وسلو او مهماتو په تړاو دوه تنه چې یو یې افغان او بل کس د پاکستان وګړی دی، نیول شوي او تر څېړنو لاندې دي.
طالبانو تروسه په اړه څه نه دي ویلي، چې دا وسلې چاته او د څه لپاره لېږدول کېدې.
تراوسه پاکستان په دې تړاو کوم غبرګون نه دی ښودلی.