د سپاه پاسداران افسرانو د حزبالله میداني مشري پر غاړه اخیستې ده
اسراییلي رسنیو راپور ورکړی، چې د لبنان حزبالله له اسراییل سره د یوې پراخې جګړې د احتمال لپاره خپلې کورنۍ ناستې او تشکیلاتي چمتووالی زیات کړی دی. ورته مهال دغه سرچینې وایي، چې د سپاه پاسداران افسرانو د دغې ډلې میداني مشري پر غاړه اخیستې ده.
اسراییلي وېبپاڼې (واینټ) د العربیه شبکې په حواله لیکلي، ارزونې ښيي چې د ایران حکومت پر حزبالله فشار راوړي، ترڅو د دغه هېواد پر وړاندې په هر ډول احتمالي نظامي برید کې برخه واخلي. هغو سرچینو چې له العربیه او الحدث سره یې خبرې کړي ویلي دي، چې د تېرې جمعې په ورځ په بقاع دره کې د اسراییل هوايي بریدونه "په ډېر احتمال سره د پراخو عملیاتو پیلامه" وه، چې کېدای شي په ایران کې له بریدونو سره هممهاله ترسره شي. د دغو سرچینو په وینا: «پر حزبالله د اسراییل نظامي برید حتمي دی او یوازې وخت یې څرګند نه دی».
د همدغو راپورونو پر بنسټ، د حزبالله اوسنی مدیریت د لبناني مشرانو له خوا نه، بلکې د سپاه پاسداران د افسرانو له خوا ترسره کېږي. ځینې دغه افسران له وړاندې په لبنان کې مېشت وو او ځینې نور یې په دې وروستیو کې پر ایران د امریکا د احتمالي نظامي برید په اړه د بحثونو له زیاتېدو وروسته دغه هېواد ته داخل شوي دي. د سرچینو په وینا، ایراني افسران د حزبالله د عملیاتي وړتیاوو د بیا رغولو ترڅنګ په خپله پر پلانونو څارنه کوي او په بېلابېلو سیمو کې د دغې ډلې له ټیمونو سره ګوري. همدارنګه راپور ورکړل شوی، چې دغو افسرانو د حزبالله د توغندیزې قطعې له غړو سره هم کتلي، چې د جمعې په برید کې په نښه شوي وو.
