د طالبانو او پاکستان چارواکو یو بل ته په «قراني ایتونو» خبرداري ورکړي

دا څرګندونې په داسې مهال کېږي چې د پاکستان د لومړي وزیر سلاکار رانا ثناءالله ګواښ کړی چې کابل او د افغانستان ټوله خاوره د پاکستان د پوځ ترهدف لاندې ده.

تر اوسه روښانه نه ده چې طالبان به د کومو وسلو په کارولو سره د پاکستان مهم ښارونه وګواښي. دا ډله بم غورځوونکې الوتکې او لرې واټن ویشتونکي توغندي نه لري چې د دغه هېواد پر مهمو ښارونو برید وکړي.

اوس مهال د طالبانو ځواکونه د پاکستان له سرحدي ځواکونو سره پر ډیورنډ کرښه په څو بېلابېلو سیمو کې په نښتو بوخت دي.

مجاهد دا ادعا هم کړې چې د دوی په بریدونو کې ۴۰ پاکستاني سرتېري وژل شوي دي، ځینې پوستې یې نیولې او یو شمېر پاکستاني سرتېري یې ژوندي هم نیولي دي.

پاکستان دا ادعاوې رد کړې دي او ویلي یې دي چې له ۴۰ څخه زیات طالبان یې وژلي دي. د دواړو لوریو دا شمېرې خپلواکو سرچینو تر اوسه نه دي تایید کړې.

مشرف زیدي زیاته کړې، نه چا پوستې نیولي او نه هم چا ته زیان اوښتی دی.

نوموړي وايي، چې د طالبانو د بې دلیله تېري پر وړاندې د دوی ځواکونو هم اغېزناک اقدامات کړي او د طالبانو عسکرو ته یې درانه زیانونه اړولي دي. د پاکستان د لومړي وزیر د ویاند په خبره، د پاکستان پر وړاندې هر ډول تېري ته به په سملاسي توګه ځواب ورکول کېږي.

تر دې وړاندې په بېلابېلو ولایتونو کې د طالبانو ویاندویانو ادعاوې کړي چې پر ډېورنډ کرښه یې په خوست، ننګرهار، کونړ، پکتیا او پکتیکا ولایتونو کې د پاکستاني عسکرو پوستې نیولي دي.

پر کابل د واکمنو طالبانو ویاند ذبیح الله مجاهد بیا ادعا کړې چې ۴۰پاکستاني عسکر په روانه جګړه کې وژل شوي او د ۱۳تنو مړي‌ هم د دوی ځواکونو له ځانه سره وړي دي.

یاد پاکستاني چارواکي زیاته کړې چې هېواد یې اوس مهال له افغان طالبانو سره په مقابله اخته او ټینګار یې کړی چې د پاکستانیانو امنیت د اسلام‌اباد لپاره سرې کرښې دي.

طلال چوهدري جیوز نیوز ته زیاته کړې چې پاکستان به هېڅ‌کله هم په خپلو بازارونو او جوماتونو کې د بمونو چاودنې ونه زغمي. نوموړي د هند يادونه هم وکړه او زياته يې کړه، هغه هېواد چې پياوړی پوځ، الوتکې او پرمختللې وسلې لري، هم ونه توانېد چې د پاکستان پر وړاندې بريالی عمل وکړي.

د پاکستان د کورنيو چارو د وزير د دولت مرستيال څرګنده کړه چې دغه هېواد به د خپلو خلکو د امنيت د خونديتوب لپاره «تر هر بريده» ګامونه واخلي، او افغانستان بايد يو سوله‌ييز ګاونډی هېواد وګرځي. د هغه په خبره، له چين څخه تر امريکا متحده ايالاتو پورې بېلابېل هېوادونه د افغانستان د وضعيت په اړه اندېښنې لري.

طلال چوہدری زياته کړه چې پاکستان د يو مسوول هېواد په توګه خپل رول ادا کوي او ټينګار يې وکړ چې «دا ترهګري به په هر ډول چې وي پای ته ورسېږي».

هغه وويل چې په بېلابېلو کچو خبرې روانې دي او د طالبانو چارواکو ته لازم وضاحت ورکړل شوی، خو د ده په ادعا، هغوی کله د پيسو غوښتنه کوي او کله وايي چې د حالاتو د کنټرول وس نه لري.

طالبانو ویلي، چې په یادو بریدونو کې تر اوسه د پاکستاني ځواکونو یوه قرارګاه او ۱۹ پوستنې سقوط کړې دي او ګڼو پوستو ته یې اور اچولی دی.

طالبانو ادعا کړې، چې په روانو بریدونو کې یې ۵۵ پاکستاني سرتېري وژلي او د ۲۳ جسدونو په ګډون یو شمېر یې ژوندي نیول شوي دي.

همدارنګه طالبانو زیاته کړې، چې د یادو غچ اخیستونکو بریدونو پرمهال یې له پاکستاني ځواکونو څخه لسګونه میله وسلې هم نېولي دي او بریدونه لا هم دوام لري.

د پاکستان حکومت تر اوسه په یادو بریدونو کې خپل لورې ته د اوښتو زیانونو په اړه څه نه دې ویلي.

فضلي پر اېکس پاڼه لیکلي، چې پاکستاني رسنۍ ادعا کوي چې د دوی عسکر «را نيابتي ډلو» يا د هندي استخباراتي ډلو له لوري په نښه شوي دي. هغه دا ادعا رد کړه او ټينګار يې وکړ چې دا ډول روايت د سيمې له تاريخي بدلونونو او پېښو سره هېڅ سمون نه لري.

د نوموړي په وينا، د ۱۹۷۰مې لسيزې راهيسې په پاکستان کې واکمنو جوړښتونو د لسګونو زرو افغان کډوالو ماشومانو له کړاو او ستونزمن حالت څخه ګټه پورته کړې ده. فضلي وليکل چې ډېری دغه ماشومان د ديني مدرسو له لارې جذب او روزل شوي او بيا داسې لوري ته سوق شوي چې د پاکستان د سيمه‌ييزو تګلارو، او همدارنګه د متحده ایالتونو او د هغه د متحدينو د موخو په چوکاټ کې يې خدمت کړی دی.

د جمهوري رياست د چارو پخواني ریيس دا پوښتنه هم راپورته کړه چې څنګه هغه ډلې چې د ده په خبره «له لسيزو راهيسې د پاکستان دننه روزل شوې دي» اوس د «را یا د هندي استخباراتو پورې تړلې ملېشې» بلل کېږي؟

هغه زياته کړه: «ايا رښتيا هم بايد دا ومنو، هغه ډلې چې کلونه کلونه د پاکستان په خاوره کې لویې شوې، د هند استخباراتو جوړې کړې وې؟»

نوموړي په دوام وويل، دوه ادعاوې په يو وخت کې سمې نه شي کېدای: «يا له طالبانو سره مطرح شوي اختلافات هغسې رښتيني نه دي لکه څنګه چې وړاندې کېږي، او يا هم پاکستان په تېرو څلورو لسيزو کې د خپلې خاورې دننه د بهرنۍ استخباراتي ادارې له فعاليت څخه ناخبره پاتې شوی دی». فضلي ټينګار وکړ: «دواړه روايتونه يو ځای سم نه شي کېدای، او دا چې يوه ادعا په لوړ غږ تکرار شي، هغه لا قانع کوونکې نه ده».

هغه په پای کې په سختو ټکو پاکستان تورن کړ چې د «جعلي خبرونو په جوړولو» کې ځانګړی مهارت لري.