د ایران ولسمشر مسعود پزشکيان پر روغتونونو او ښوونځيو بريدونه په کلکه وغندل او هغه يې د بشري اصولو ښکاره سرغړونه وبلله. هغه ویلي: ««پر روغتون بريد پر ژوند بريد دی او پر ښوونځي بريد د يو ملت پر راتلونکي بريد دی».
پزشکیان د ناروغانو او ماشومانو په نښه کېدو ته په اشارې سره زياته کړه، چې دا ډول کړنې د ټولو انساني ارزښتونو څرګنده ماتونه ده او نړۍواله ټولنه بايد دا ډول کړنې په ښکاره توګه وغندي.
هغه له زيانمنو شويو ایرانیانو سره خواخوږي څرګنده کړې او ویلي یې دي، چې د ټپيانو او زيانمنو شويو تر څنګ ولاړ دی. نوموړي زیاته کړې، چې د ایران حکومت به د دغسې «جنايتونو پر وړاندې چوپ پاتې نهشي او نه به هم ورته سر ټيټ کړي».
دغه څرګندونې په داسې حال کې کېږي، چې د ایران پر ملکي بنسټونو او عامه تاسيساتو بريدونه د هېواد دننه او بهر له پراخو غبرګونونو سره مخ شوي دي.
