پوتین په ایران او سیمه کې د روان وضعیت د کابو کولو لپاره پر ډيپلوماټیکو حللارو ټینګار کړی

د روسیې ولسمشر ولادیمیر پوتین له خپل ایراني سیال سره په ټېلیفوني اړیکه کې د ایران د وضعیت په اړه خبرې کړي او د روان وضعیت د حل لپاره یې پر ډیپلوماټیکو لارو ټینګار کړی دی.
د روسیې بهرنیو چارو وزارت د یوې خبرپاڼې په خپرولو سره ویلي، چې د یادې ټېلیفوني اړیکې پر مهال د روسیې ولسمشر ولادیمیر پوتین د امریکا او اسراییل د بریدونو له امله ملکي وګړو ته د اوښتې مرګژوبلي په تړاو خواخوږي څرګنده کړې ده.
پوتین په دې ټېلیفوني اړیکه کې په منځني ختیځ کې د جګړې پر سمدستي درېدو او ډیپلوماټیکو حللارو ته پر بېرته ګرځېدو ټينګار کړی دی.
په خبرپاڼه کې د پوتین له قوله لیکل شوي: «روسیه په سیمه کې د هر ډول مسایلو د حل لپاره د زور او وسلو کارول ردوي. مسکو د خلیج د همکارۍ شورا له غړو هېوادونو سره په دوامداره اړیکه کې دی څو کړکېچ مهار کړي».
د ایران ولسمشر مسعود پزشکیان د روسیې له همکارۍ څخه مننه کړې او د دواړو هېوادونو تر منځ یې پر نږدې همکاریو ټینګار کړی دی.
